Congress: गोधन न्याय योजना ले हितग्राही मन ल मिलही किसान सम्मान योजना ले जादा राशि : शैलेश नितिन त्रिवेदी
जय जोहार…. (congress) सीएम भूपेश बघेल के तरफ ले गोधन न्याय योजना के तहत गोबर खरीदी के पहिला भुगतान हितग्राही मन के खाता म अंतरित करे के कांग्रेस ह स्वागत करे हे।
प्रदेश कांग्रेस संचार विभाग के प्रमुख शैलेश नितिन त्रिवेदी ह कहिन कि गोबर खरीदी ले मिलइया राशि ह गरीब समाज के अंतिम छोर म खड़ा व्यक्ति तक पहुंचही।
गोधन न्याय योजना ले हितग्राही मन ल किसान सम्मान योजना ले जादा राशि मिलही। कांग्रेस सरकार बने के बाद प्रदेश म मजदूर, किसान, पसुपालक अउ गरीब मन के स्थिति म बड़का बदलाव आये हे।
भूपेश बघेल के सरकार ह गोबर खरीद के पशुपालक अउ जैविक खेती ल बढ़ावा देवइया देश के ही नई संसार के पहली सरकार हे।
प्रदेश कांग्रेस (congress) संचार विभाग के प्रमुख शैलेश नितिन त्रिवेदी ह कहिन कि 15 साल भाजपा के रमन सरकार म गौशाला के संचालन के नाम म करोड़ों रूपिया अनुदान ह गाय के पेट म नई, पशुपालक मन ल नई, भाजपा नेता मन के पेट म जात रिहिस। ए स्थिति ल बदले के बीड़ा सीएम भूपेश बघेल ह उठाये हे।
प्रदेश कांग्रेस (congress) संचार विभाग के प्रमुख शैलेश नितिन त्रिवेदी ह कहिन कि 50 हजार हितग्राही, पशुपालन मन ल एक करोड़ 65 लाख रूपिया के भुगतान करे गे हे।
जेमा 38 प्रतिशत महिला हितग्राही, 48 प्रतिशत अन्य पिछड़ा वर्ग, 39 प्रतिशत अनुसूचित जनजाति, 8 प्रतिशत अनुसूचित जाति अउ 5 प्रतिशत सामान्य वर्ग के हितग्राही हे। गोबर खरीदी के अवइया भुगतान ल 15 अगस्त के करे जाही।
