Raipur : हाट बाजार क्लीनिक ले मिलत हे बेहतर स्वास्थ्य सुविधा

जय जोहार। (Raipur) स्वास्थ्य विभाग के अमला ह हाट बाजार क्लीनिक के माध्यम ले बेहतर स्वास्थ्य सुविधा उपलब्ध करावत हे। राज्य के ग्रामीण अंचल म एक लाख 44 हजार 962 हाट बाजार क्लीनिक के आयोजन करे गेहे। ए आयोजन म 82 लाख ले जादा मरीज ल सीधा फायदा मिले हे । स्वास्थ्य विभाग डहार ले हाट बाजार म आयोजित करे जावत क्लीनिक म मनखे मन ल उपचार के संगेसंग मुफत दवाई अउ पैथोलॉजी के सुविधा मिलत हे। योजना के अंतर्गत राज्य म 429 डेडिकेटेड ब्राडिंग वाहन अउ चिकित्सा दल के माध्यम ले दूरस्थ अंचल म मनखे मन के इलाज करे जात हे।

छत्तीसगढ़ सरकार के फ्लैगशिप योजना मुख्यमंत्री हाट बाजार क्लीनिक योजना ले बस्तर-सरगुजा समेत राज्य के अन्य पहुंचविहीन अउ दुर्गम इलाका म रहवइया मनखे काफी फायदा होवत हे । जिहां एक डहार ए योजना ले महिला अउ लईका मन के पोसण म सतत् निगरानी होवत हे त उंहे दुसरइया डहार योजना ले बस्तर म मलेरिया उन्मूलन अभियान ल गति मिले ही । ए इलाका म महिला अउ लईका मन के पोसण स्तर के जांच अउ कुपोसण के रोकथाम बर घलो ये योजना कारगर सिद्ध होवत हे।

मुख्यमंत्री हाट-बाजार क्लीनिक योजना के अंतर्गत प्रदेस म अब तक 23 लाख 13 हजार 461 मनखे मन के उच्च रक्तचाप, 19 लाख 88 हजार 675 मनखे मन के मधुमेह, छह लाख 19 हजार 015 मनखे मन के मलेरिया जांच, चार लाख 73 हजार 560 मनखे मन के रक्त-अल्पता (एनीमिया) अउ दो लाख 90 हजार 047 मनखे मन म नेत्र विकार के जांच करे गेहे । ए क्लीनिक म 58 हजार 681 मनखे मन के टीबी, 31 हजार 700 मनखे मन के कुष्ठ अउ 45 हजार 640 मनखे मन के एचआईव्ही जांच घलो करे गेहे ।