पहुना मन के घर भेंट मुलाकात के दौरान करे रिहिन भोजन, अब सीएम भूपेश बघेल के आतिथ्य म भोज
रायपुर. मुख्यमंत्री भूपेश बघेल ह जेन लोगन मन घर भेंट मुलाकात के दौरान भोजन करे रिहिन ओमन ल सीएम हाऊस म भोज बर सह-परिवार नेवता दे हे। इही कड़ी सरगुजा ले पहुना मन आज मुख्यमंत्री निवास पहुंचे रिहिन। सीएम बघेल ह ए बेरा म ओखर मन संग भोज म संघरिन अऊ एक एक टेबल म जाके गोठ-बात करिन।
मुख्यमंत्री ह जम्मो पहुना मन के अपन निवास व स्वागत करत कहिन कि में ह आप सब मन के घर म भोजन करेंगे अऊ जेन स्नेह अऊ अपनत्व ले आप मन मोर स्वागत करे रेहेव ओखर ले में अभिभूत हों। आप मन मोला तेंदू सहित अनेक फल, किसम किसम के भाजी सरगुजा और जशपुर में हे ओला खिलाएव जेन ल में आज तक नई खाए रेहेंव। सीएम बघेल कहिन कि महू ल एखर सती अवसर मिलना चाही कि आप मन के स्वागत कर सकंव।
ए बेरा म मुख्यमंत्री खुदे भोजन टेबल म जाके एक-एक परिवार ले भेंट घलो करिन अऊ गोठबात करिन। बड़ आत्मीयता ले मुख्यमंत्री ह ओखर मन के हालचाल पूछिन अऊ घर परिवार के गोठ-बात करिन। मुख्यमंत्री ह सरगुजा ले आए पहुना मन बूर पारंपरिक छत्तीसगढ़ी व्यंजन मूंग दार के बड़ा, अम्मटहा भिंडी, लौकी चना दार, मूंग भाटा, आलू, टमाटर चटनी के चटनी बनवाए रिहिन।
कार्य़क्रम म स्कूल शिक्षा मंत्री डॉ प्रेम साय सिंह टेकाम, संसदीय सचिव अम्बिका सिंहदेव अऊ विधायक डॉ विनय जायसवाल, रामपुकार सिंह, खेलसाय सिंह, गुलाब कमरो, पारसनाथ राजवाड़े घलो संघरे रिहिन। मुख्यमंत्री भूपेश बघेल के नेंवता म निवास पहुंचे पत्थलगांव विधानसभा के बागबहार निवासी गौरीशंकर यादव ह अपन अनुभव ल साझा करत कहिन कि हमन ह ए कभू नई सोचे रेहेन कि कभू राज्य के मुख्यमंत्री ह हमर घर भोजन करे बर आही। हमन ह मुख्यमंत्री जी ल देसी भोजन कराए रेहेने जेला ओमन ह बड़ प्रेम ले ग्रहण करिन। एखर बाद ओमन हमन ल अपन निवास म नेंवता दे के हमर मन के मान ल बढ़ा दिन।
सीतापुर विधानसभा के मैनपाट विकासखण्ड के ग्राम राजापुर ले आए राजनाथ एक्का ह बताईन कि हमन कभू नई सोचे रेहेन कि मुख्यमंत्री एक आदिवासी किसान घर आही। अऊ ओखर घर भोजन करही। ओमन बताईन कि मुख्यमंत्री ह लकड़ा के चटनी अऊ कोइलरी भाजी खाए रिहिन। आज मुख्यमंत्री निवास आके बड़ सुघ्घर लागत हे। संग म राजनाथ एक्का ह मुख्यमंत्री बर गुड़ अऊ लीची भेंट करिन.
उहें सामरी विधानसभा के शंकरगढ़ ले आए सत्यनारायण अग्रवाल के घर घलो मुख्यमंत्री भूपेश बघेल ह पाछू के 4 मई म भोजन करे रिहिन। वहू मन आज मुख्यमंत्री निवास आए रिहिन। ओमन ए बात ले बड़ खुश हे कि मुख्यमंत्री ह छत्तीसगढ़ के परंपरा के निर्वहन करत हे अऊ हमू मन ल भोज म नेवता दे हे।
