अमेरिका म रहिके भी नई भुलिस मदद करना सीएम भूपेश बघेल, किडनी पीड़ित बर अस्पताल ल देवाइस तीन लाख के अधिक के भुगतान

जय जोहार रायपुर…. मुख्यमंत्री भूपेश बघेल ये बखत अमेरिका प्रवास म हे, लेकिन वो हा अमेरिका म रहते हुए सुपेबेड़ा के किडनी रोग ले पीड़ित दुर्योधन पुरैना के आर्थिक मदद करिस हे। निजी अस्पताल के तीन लाख 32 हजार के बिल के भुगतान कांग्रेस प्रवक्ता विकास तिवारी ल अस्पताल भेजकर करवाइस।

गौरतलब हे कि गरियाबंद जिला के सुपेबेड़ा म किडनी के बीमारी ले बड़ी संख्या म लोग मन पीड़ित हे, जेखर अलग-अलग अस्पताल मन अऊ गांव म कैंप लगाकर इलाज करे जावत हे। ऊहचे किडनी के बीमारी के चलत अब तक 73 लोग मन के मौत हो चुके हे।

बता दन कि मुख्यमंत्री भूपेश बघेल दस दिन के अमेरिका प्रवास म हे। वो हा अमेरिका के हार्वर्ड यूनिवर्सिटी म आयोजित 17वें वार्षिक भारत सम्मेलन म शामिल होइस अऊ भारतीय प्रवासी मन खासकर छत्तीसगढ़ी मन ल संबोधित करिस।