भूपेश कैबिनेट के बड़का फइसला, एक नवंबर ले होही शिक्षाकर्मी मन के संविलियन

जय जोहार…. छत्तीसगढ़ सरकार ह शिक्षाकर्मी मन के संविलियन के ऐलान ल कर दे हे। एक नवंबर 2020 ले शिक्षाकर्मी मन के संविलियन करे जाही।

दू वर्ष अउ ओखर अधिक के सेवा अवधि पुरा करइया शेष बचे पंचायत अउ नगरीय निकाय संवर्ग के शिक्षक मन के संविलियन एक नवंबर ले स्कूल शिक्षा विभाग म करे जाय के अनुमोदन करे गे हे। एखर लाभ 16278 शिक्षक मन ल मिलही।

मुख्यमंत्री भूपेश बघेल के अध्यक्षता म आज ओखर राजधानी निवास कार्यालय म मन्त्रिपरिषद के बइठक होय हे। एमा कई महत्वपूर्ण निर्णय ले गे हे।
ए बइठक म नरवा, गरुवा, घुरुवा अउ बाड़ी के स्वीकृत गौठान ल रोजगारोन्मुखी बनाय बर गोधन न्याय योजना ल अनुमोदित करे गिस। ए योजना के हरेली पर्व ले शुरुआत होही।

प्रदेश म अब तक 5300 गौठान स्वीकृत करे जा चुके हे। जेखर ले ग्रामीण क्षेत्र म 2408 अउ शहरी क्षेत्र म 377 गौठान बन चुके हे, जिहां ए योजना के शुरुआत करे जाही।
प्रदेश म स्थापित गौठान म गोवंशीय अउ भैसवंशीय पशुपालक ले गौठान समिति के माध्यम ले गोबर क्रय कर ओखर ले वर्मी कम्पोस्ट अउ आन उत्पाद ल तैयार करे जाही।

एखर ले जैविक खेती ल बढ़ावा के संग ग्रामीण अउ शहरी क्षेत्र म रोजगार के नवा अवसर, गौपालन अउ गौसुरक्षा ल प्रोत्साहन, खुले चराई म रोक, द्विफसली क्षेत्र के विस्तार के संग पशुपालक मन ल आर्थिक लाभ ह प्राप्त होही।