कबीरधाम जिला में पांच बड़े वनांचल केन्द्र दलदली, बोक्करखार, झलमला, कुकूदर अउ छिरपानी में बाईक एम्बुलेस के सेवा मिले ले अब तक दू हजार 268 मरीज ल ए सुविधा के सीधा लाभ मिलिस हे। बाईक एम्बुलेंस ले वनांचल क्षेत्र के 332 गर्भवती महिला ल संस्थागत प्रसव खातिर स्वास्थ्य केन्द्र पहुंचाय गिस। 346 शिशुवती महतारी मन ल प्रसव के बाद सुरक्षित घर पहुंचाय गिस। 1120 गर्भवती महतारी मन के नियमित स्वास्थ्य परीक्षण बर स्वास्थ्य केन्द्र लाय गिस। 293 लइका मन ल टीकाकरण अउ मौसमी बीमारी के उपचार बर अस्पताल पहुंचाय गिस। 166 मरीज मन ला आपात कालीन में स्वास्थ्य केन्द्र पहुंचा के वोमन ल बचाय गिस। इही तरह ले 11 मरीज मन ला उपस्वास्थ्य केन्द्र ले सामुदायिक केन्द्र पहुंचा के वोमन ल बेहतर स्वास्थ्य सुविधा दे गिस।
कलेक्टर के विशेष पहल ले शुरू होइस बाईक एम्बुलेस
कबीरधाम कलेक्टर अवनीश कुमार शरण के विशेष पहल म जिला के बैगा अउ आदिवासी बाहुल बोड़ला-पंडरिया विकासखण्ड के सूदूर अउ दुर्गम पहाड़ी में रहैया परिवार ल बेहतर स्वास्थ्य सुविधा मुहैया कराय बर 15 जुलाई 20178 के बाईक एम्बुलेंस सेवा शुरू करे गिस। पहली जिला के तीन स्वास्थ्य सेक्टर में येला चलाय जात रिहिस। बाद में लोगन ए बाईक एम्बुलेंस सेवा के सराहना करिन अउ दूसर वनांचल क्षेत्र में चलाय के मांग करिन। मांग के आधार म अब जिला के पांच बड़़े वनांचल ग्राम दलदली, बोक्करखार, झलमला, कुकूदर अउ छिरपानी में बाईक एम्बुलेंस चलाय जात हे। एक सेक्टर के आसपास के दस ले पन्द्रा गांव ल बाईक एम्बुलेंस के सेवा मिलत हे।
