बिलासा देवी केंवट एयरपोर्ट विस्तार ला मिलिस रफ्तार: 290.8 एकड़ सेना के जमीन हस्तांतरित, 4C श्रेणी के रद्दा साफ”

बिलासपुर. बिलासपुर के बिलासा देवी केंवट हवाई अड्डा चकरभाठा ला अंतरराष्ट्रीय स्तर के एयरपोर्ट बनाए के डहर मा सोमवार के एक ऐतिहासिक कामयाबी मिलिस। जिला प्रशासन ला 290.8 एकड़ सेना के जमीन विधिवत सौंपे गिस, जेकर ले एयरपोर्ट विस्तार अउ 4C श्रेणी मा बदले के रद्दा पूरी तरह साफ हो गे हे।

सहर के ए बड़ पुराना मांग अउ विस्तार प्रोजेक्ट ला आज बड़े गति मिलिस, जब भारतीय सेना अउ रक्षा संपदा कार्यालय (DEO) जबलपुर के अधिकारी मन डहर ले 290.8 एकड़ जमीन के औपचारिक हस्तांतरण जिला प्रशासन ला करे गिस। ये पूरा प्रक्रिया कलेक्टर संजय अग्रवाल के मौजूदगी मा पूरा होइस।

जमीन हस्तांतरण के बेरा मा सैन्य अधिकारी अउ DEO जबलपुर के प्रतिनिधि मन ह मालिकाना हक के जरूरी कागज मा दस्तखत करके जमीन ला प्रशासन ला सौंप दीन। ए बड़े कदम के बाद अब एयरपोर्ट बर कुल 646.8 एकड़ जमीन हो गे हे, जेहा एकर  विस्तार बर काफी हे।

ए अतिरिक्त जमीन मिले ले रनवे  विस्तार अउ एयरपोर्ट ला 4C श्रेणी मा अपग्रेड करे मा जउन तकनीकी अड़चन आवत रिहिस, ओहा अब खत्म हो गे हे। 4C श्रेणी मा आए ले अब बिलासपुर मा बड़े विमान मन के आना-जाना सुरू होही, जेकर ले बिलासपुर ह देश के बड़े सहर मन ले हवाई रद्दा ले जुड़ जाही अउ क्षेत्र के विकास ला नवा उड़ान मिलही।