भूपेश सरकार के खिलाफ भाजपा वाले मन बोलीन हल्ला ।

आज रायपुर के बूढ़ा तालाब धरना स्थल म भारतीय जनता पार्टी के सैकड़ों कार्यकर्ता मान जुरियाईन अउ भूपेश बघेल सरकार के खिलाफ हल्ला बोलीन। ये धरना प्रदर्शन के कमान पूर्व मुख्यमंत्री डॉ रमन सिंह अउ पूर्व मंत्री बृजमोहन अग्रवाल संभालत रहीस।

धरना म बोलत हुए बृजमोहन अग्रवाल ह किहीस कि ये सरकार के त्रिया चरित्र 6 महीना म उजागर होगे हे। जब ले ये सरकार बने हे तब ले राज्य म अपराध ह बढ़त जात हे, बिजली बिल हाफ करत करत बिजली ला ही हाफ कर दिन हे ये सरकार ह।

अइसने पूर्व मुख्यमंत्री डॉ रमन सिंह ह बोलीस कि हमर सरकार खाद्य सुरक्षा कानून लाय रहीस जेखर चलते गरीब किसान मन ला दू जून के रोटी मिलत रहीस । ये सरकार ह आते बराबर दाल अउ नमक के वितरण ला बंद कर दीस। जनता सब देखथ हे एखरे नतीजा हे कि लोकसभा के चुनाव म कांग्रेस के राज्य में पत्ता साफ हो गे।

ये धरना प्रदर्शन म भारतीय जनता पार्टी के सैकड़ों कार्यकर्ता मन शामिल होइन।सब्बो झन ये मौका म संकल्प लीन  कि अवैय्या नगर निगम चुनाव म कांग्रेस ल धुर्रा म मिलाना हे ।