रायपुर. दंतेवाड़ा म बीजेपी विधायक के काफिला म मंगलवार के होय नक्सली हमला लेके प्रदेश के पुलिस महानिदेसक ह बड़ा खुलासा करे हे.
पुलिस महानिदेशक डीएम अवस्थी ह पत्रकार मन ले चर्चा म कहिन के, बीजेपी विधायक भीमा मंडावी के सुरक्षा चुनाव प्रचार के दउरान बढ़ा दे गे रिहिस हे. डीआरजी के 50 अतिरिक्त जवान भीमा मंडावी के सुरक्षा म लगे रिहिस, जे उंखर संग मंगलवार दुपहर डेढ़ बजे तक रिहिस हे. येखर बाद चुनाव प्रचार समाप्त होय के हवाला दे के खुद भीमा मंडावी ह उमन ल वापिस लउट देय रिहिस हे.
पुलिस महानिदेशक डीएम अवस्थी ह कहिन के, दुपहर म भोजन के बाद बीजेपी विधायक भीमा मंडावी किरंदुल पार्टी कार्यालय ले बचेली के ओर आत रिहिस हे. येखर जानकारी बचेली थाना प्रभारी आदित्य सिंह ल होइस. आदित्य सिंह ह भीमा मंडावी ल मोबाइल फोन म करीब दुपहर 3 बजकर 50 मिनट म कॉल करिन अउ कहिन के, आप मन ह बचेली ले कुआकोंडा मार्ग म जात हव, त ये मार्ग म आरओपी (रोड ओपनिंग पार्टी) नइए. पुलिस महानिदेशक अवस्थी के अनुसार पर्याप्त सुरक्षा नई होय के कारन उमन ल ये मार्ग म जाए ले थाना प्रभारी ह मना करिस हे, लेकिन उमन आगू बढ़ गिस.
घटना के बाद छत्तीसगढ़ एंटी नक्सल ऑपरेशन के डीजी गिरधारी नायक नह कहिन के, घटना ल अंजाम देवईया नक्सली मन के संख्या करीब 25 रिहिस हे. मामला म जांच करे जात हे. आईईडी ब्लास्ट के घटना ल रिमोट ले अंजाम देय गिस हे या फेर वायर के माध्यम ले, ये जांच के बाद ही पता चलही. गिरधारी नायक ह कहिन, नक्सली के खेलाफ अभियान लगातार जारी हे.
Other Articles
