बेवसायिक कोर्स ल मुख्य विषय बनाए के चलत हे प्रक्रिया

रायपुर। बेवसायिक पाठ‌्यक्रम (वोकेशनल कोर्सेस) ल घलो अब 11वीं अउ 12वीं म मुख्य विषय बनाय के प्रक्रिया शुरू हो गे। एखर बर छत्तीसगढ़ माध्यमिक शिक्षा मंडल ह पांच झन सदस्य के कमेटी के गठन करे हे। ये कमेटी ह बेवसायिक पाठ्यक्रम ल 11वीं अउ 12वीं म मुख्य विषय के रूप म शामिल करे के निर्णय लिही । अभी ये विषय ल अतिरिक्त विषय के रूप म पढ़ावत रिहिन। मुख्य विषय बने के बाद वोकेशनल कोर्स ल लेके पढ़ई करइया छात्र मन के अंक परिणाम म एक साथ जुड़ही।

बतात हन कि राष्ट्रीय माध्यमिक शिक्षा अभियान ह माशिमं ल पत्र लिखके 11वीं अउ12वीं के बेवसायिक पाठ‌्यक्रम ल मुख्य कोर्स के संग शामिल करे के मांग करे रहीस। जेखर बाद माशिमं ह ये निर्णय ल लीन हे। राज्य म समग्र शिक्षा अभियान के तहत नवा बेवसायिक पाठ‌्यक्रम म मल्टीमीडिया ट्रेड, आर्ईटी, हेल्थ केयर, एग्रीकल्चर, ऑटोमोबाइल, रिटेल, ब्यूटी वेलनेस अउ टेलीकम्यूनिकेशन, बैंकिंग फाइनेंस, एनिमेशन, इलेक्ट्रॉनिक्स एंड हार्डवेयर कोर्स संचालित हे। जेमा 50 हजार ल जादा विद्यार्थी पढ़ई करत हे।