कैबिनेट बइठक ….. अधिसूचित क्षेत्र के युवामन ल जिला स्तर  म नउकरी

सवरन आरक्षन के समय सीमा तय नइए

रायपुर। कांग्रेस सरकार के आज कैबिनेट बइठक होइस। एमा मुख्यमंत्री भूपेश बघेल के अध्यक्षता म राज्य म सवरन आरक्षन लागू करे समेत कई अहम फइसला म मुहर ल गेहे।   प्रदेस बर  धान खरीदी जइसे अहम मुद्दा व लेके  होए चरचा म  85 लाख मीट्रिक टन धान खरीदी के लक्ष्य रखे गेहे। बइठक म सर्वसम्मति ले होए फइसला म लक्ष्य के पूर्ति  बर समय सीमा घलो निर्धारित कर दे गिस हे। ए लक्ष्य क पूर्ति  बर राज्य के सबो केंद्र मन म 31 जनवरी तक ही धान खरीदी होही।  बइठक के बाद प्रेस ल संबोधित करत हुए कैबिनेट मंत्री मोहम्मद अकबर ह बताइस के बइठक म लैंड डायवर्सन के सरलीकरन के निरदेस घलो जारी करे गेहे। एखर संग ही स्थानीय उद्योग मन ल  प्रोत्साहन देय के बात कहे गेहे।

कैबिनेट के बइठक म सबले महत्वपूरन फइसला 5वीं अधिसूचित क्षेत्र के युवा मन ल जिला स्तर म नउकरी मिले के हे।  कैबिनेट के बइठक म सरकार ह फइसला  लेय हे के अधिसूचित क्षेत्र के युवा मन तृतीय अउ चतुर्थ वर्ग श्रेनी के नउकरी जिला स्तर म ही मिलही।

 सरकार ने ए क्षेत्र मन म नउकरी सीमा के अवधि दो साल तक बढ़ा दीस हे। एखर संग ही छत्तीसगढ़ म जैम पोर्टल ले होवइया खरीदी ल बंद कर सरकारी उपक्रम सीएसआईडीसी ले खरीदी करे के फइसला लेय गिस हे।

 मीडिया ले चर्चा करत हुए मंत्री रविन्द्र चौबे सवर्ण आरक्षन छत्तीसगढ़ म लागू करे के बात कहिन। उमन बताइन के इहां घलो सवर्ण आरक्षन लागू होही।  लेकिन एखर बर समय सीमा फिलहाल तय नइ करे गेहे।