बरसा के पानी ल सहेजे खातिर गांव वाला मन जुर-मिल के बांध डारिन नरवा ला, अधिकारी मन घलो करिन श्रमदान
जशपुरनगर। छत्तीसगढ़ सरकार के नरवा गरूवा, घुरवा, बारी योजना के अंतर्गत नाला मन ले बोहावत बरसा के पानी ला रोके-सहेजे खातिर अउ भू-जल स्तर ला बेहतर बनाए के अभियान जशपुर जिला म लगातार चलत हे।
ग्रामीण मन खुद अपन ले होके जल संरक्षण बर स्थानीय संसाधन के उपयोग अउ श्रमदान करके नाला मन ला जगा-जगा बोल्डर पथरा ले बांधत हें। जशपुर जिला के मनोरा विकासखंड के ग्राम पंचायत खोंगा के ग्रामीण मन हा 8 जुलाई के श्रमदान करके अम्बाकोना नाला म बोल्डर चेक के निर्माण करिन।
ग्रामीण मन के उत्साह ला अउ बढ़ाए बर जनपद पंचायत मनोरा के सीईओ अनिल तिवारी, एसडीओ आरईएस श्री सुदर्शन उरांव, मनरेगा के कार्यक्रम अधिकारी संतोष कुमार गाड़ा, सरपंच श्रीमती आरती, उपसरपंच श्याम किशोर समेत अउ कतको लोगन मन घलो नाला बांधे म श्रमदान करिन।
सरपंच श्रीमती आरती के कहना हे कि जल संरक्षण बर जनसहभागिता जरूरी हे। उंकर गांव के लोगन मन गांव ले बहने वाला अम्बानाला म बोल्डर चेक के निर्माण करिन हें। एकर ले पानी रूकही अउ निस्तारी के सुविधा मिलही। भू-जल स्तर घलो बाढ़ही। ओमन बताईन कि श्रमदान करके नाला ला अउ दूसर स्थान मा घलो बांधे जाही।
Other Articles
ए साल घलो ऑनलाइन होही पीएटी के काउंसिलिंग ह
