प्रधानमंत्री आवास म गड़बड़ी के मामला गूंजिस विधानसभा म

रायपुर । छत्तीसगढ़ विधानसभा के मानसून सत्र के तीसर दिन बुधवार ल जल आवर्धन, सड़क हादसा अउ प्रधानमंत्री आवास म गड़बड़ी के मामला को लेके कांग्रेस ह सरकार उपर हमला बोलिस।
जेकर जवाब म मंत्री राम सेवक पैकरा ह कहिन के ठेकेदार के भाग नइ ले के वजह ले विलंब होवत हे। ये ह कब पूरा होही येकर समय सीमा ल बताना संभव नइए। लेकिन काम ह तेजी ले चलत हे। उहें कांग्रेस विधायक डॉ. चुन्नीलाल साहू अउ मोतीलाल देवांगन ह अकलतरा क्षेत्र म सड़क हादसा के मुद्दा उठाइन। जवाब म गृह मंत्री रामसेवक पैकरा ह कहिन के सड़क निरमान के काम जारी हे। घटना मन म कमी घलो आगे हे। उमन कहिन के दुरघटना स्थल ल चिन्हांकित करके ओला ठीक करे जात हे। इहीं तरह कांग्रेस विधायक धनेंद्र साहू ह प्रधानमंत्री आवास म गड़बड़ी के मुद्दा उठाइस हे। उमन कहिन के पहली किस्त के राशि तको नइ दे जात हे। उमन ह आरोप लगाइव के प्रधानमंत्री आवास योजना म ठेकेदार अउ माफिया सक्रिय होके गड़बड़ करत हे। उमन येकर जांच कर दोषी मन उपर कार्रवाई के मांग करिन।
नगरीय प्रशासन मंत्री अमर अग्रवाल ह जवाब म कहिनन के ये ह मोर जमीन-मोर मकान के मामला हे अउ येमा कोनो ठेकेदारी प्रथा नइए। उमन कहिन के जे 20 लोगन के मामला उठाय जात हे, ये ह सही हे के उमन ल तकलीफ होइस हे। अमर ह कहिन के ये मामला म सर्वे म नाम आय रिहिस हे, वेरिफिकेसन नइ होय ले गड़बड़ी आघू आइस अउ सीएमओ समेत दू अधिकारी ल निलंबित कर दे गेहे।