chhattisgarh के उर्वरक मांग म केन्द्र ह कर दीन हे 45 प्रतिसत के कटौती, कम आवंटन ले प्रदेश म उर्वरक के होगे कमी

जय जोहार। छत्तीसगढ़ (chhattisgarh ) राज्य ल चालू रबी सीजन बर केन्द्र सरकार डहार ले मांग के अनुसार रासायनिक उर्वरक के आपूर्ति ल नई करे के सेती प्रदेस म किसान मन ल रासायनिक खाद ल लेके दिक्कत के सामना करे ल पड़त हे। चालू रबी सीजन बर आने आने प्रकार के कुल 7 लाख 50 हजार मेट्रिक टन रासायनिक उर्वरक के डिमांड भारत सरकार ले करे रिहीन, परंतु आज के स्थिति म छत्तीसगढ़ राज्य ल मात्र 3 लाख 20 हजार मेट्रिक टन उर्वरक ही मिले हे ।

गौरतलब हे कि छत्तीसगढ़ (chhattisgarh )सरकार के रासायनिक उर्वरक के डिमांड कोटा म 45 फीसद के कटौती घलो केन्द्र सरकार ह कर दीन हे । 7 लाख 50 हजार मेट्रिक टन के विरूद्ध केन्द्र ह मात्र 4 लाख 11 हजार मेट्रिक टन उर्वरक ल प्रदाय करे जाय के स्वीकृति दीन हे । जेखर सेती राज्य म रासायनिक उर्वरक के कमी के स्थिति ह निर्मित हो गेहे । एखर बावजूद घलो राज्य के किसान मन ल रासायनिक उर्वरक के उपलब्धता के आधार म सोसायटी ले खाद उपलब्ध कराय जावत हे ।

छत्तीसगढ़ (chhattisgarh ) राज्य विपणन संघ ले प्राप्त जानकारी के अनुसार छत्तीसगढ़ राज्य ल अब तक यूरिया 1,17,522 मेट्रिक टन प्राप्त होय हे, जेन राज्य के मांग के मात्र 34 प्रतिसत हे । अइसने छत्तीसगढ़ राज्य ल मांग के डीएपी मात्र 28 प्रतिसत, पोटाश 53 प्रतिसत, एनपीके काम्प्लेक्स 43 प्रतिसत प्राप्त होय हे ।