जय जोहार। (Raipur) केंद्रीय संसदीय समिति ह छत्तीसगढ़ म अनुसूचित जाति अउ जनजाति वर्ग के सामाजिक, आर्थिक अउ शैक्षणिक क्षेत्र म करे जावत काम के तारीफ करीन । संसदीय समिति के अध्यक्ष डॉ. प्रोफेसर किरीट प्रेमजीभाई सोलंकी ह किहीन कि राज्य म प्रयास विद्यालय डहार ले ए वर्ग के संगेसंग नक्सल प्रभावित परिवार के लईका मन बर शिक्षा के क्षेत्र म करे जावत बेहतर काम सराहनीय हे ।
बइठक म संसदीय दल के सदस्य म डॉ. नीरज डांगी, जगन्नाथ सरकार, डॉ. वी. शिवादासन, कामाख्या प्रसाद तासा, संसदीय दल के संग आए संयुक्त सचिव डी.आर. चंद्रशेखर अउ अन्य अधिकारी उपस्थित रिहीन। समीक्षा बइठक म डॉ. प्रोफेसर किरीट प्रेमजीभाई सोलंकी ह अनुसूचित जाति, अनुसूचित जनजाति अत्याचार निवारण अधिनियम (ऐट्रोसिटी एक्ट) के तहत छत्तीसगढ़ राज्य म करे जावत उपाय के सराहना करत हुए पुलिस बल के पूरा टीम ल बधाई दीन।
गौरतलब हे कि अनुसूचित जाति अउ जनजाति के मामला म गठित केंद्रीय संसदीय समिति ह छत्तीसगढ़ के दू दिन के दउरा म हे। संसदीय समिति के अध्यक्ष डॉ. प्रोफेसर किरीट प्रेमजीभाई सोलंकी के नेतृत्व म समिति ह 15 जनवरी के राजधानी रायपुर म संचालित प्रयास आवासीय कन्या विद्यालय के भ्रमण कर विद्यालय के व्यवस्था अउ शैक्षणिक गतिविधि के जायजा ले रिहीन ।
