चक्रधर समारोह म बोहावत हे गीत संगीत के धारा , रोज चार से पांच कलाकार मन देवत हे प्रस्तुति

चक्रधर समारोह म नौवा दिन रिखी छत्रिय अऊ ऊंखर टीम द्वारा लोकवाद्य के अनोखा जुगलबंदी  प्रस्तुत करे गिस । विभिन्न प्रकार के वाद्य यंत्र जईसे ढोलक, खंजेरी, तंबूरा, चटकोला, धनकुल, दफड़ा, झुनझुना, मांदरी, मोहरी और बांसुरी ल  एक साथ बजा के  दर्शक मन ल मंत्रमुग्ध कर दिस । दर्शक मन वाद्य यंत्र ले  ससुराल गेंदा फूल अऊ  सारे जहां से अच्छा हिन्दोस्तां हमारा गीत सुन के खूब ताली  बजाईंन । एखर  बाद पंडित गजेंद्र कुमार पंडा अऊ  आर्या नंदे ह  ओड़ीसी नृत्य के प्रस्तुति दीन । ऊंखर टीम के द्वारा भगवान शिव के अद्र्धनारीश्वर स्वरूप म  ओड़ीसी नृत्य के माध्यम ले प्रस्तुति दे गिस । मुम्बई ले आय  युवा बांसुरी वादक पलक जैन ह  कई गीत के धुन म  बांसुरी बजा के समां बांध दिस । पलक ह  ऐ मेरे वतन के लोगों अऊ  अन्य गीत बांसुरी ले  लोगन मन ल  सुनाइस । पद्मश्री विजय घाटे के तबला वादन ह दर्शक मन के मन मोह लिस,   गौतम चौबे ह  छत्तीसगढ़ी लोकगाथा लोरिक चंदा के प्रस्तुति दीस ।
कार्यक्रम के  शुभारंभ सारंगढ़ विधायक श्रीमती उत्तरी गनपत जांगड़े अऊ रायगढ़ विधायक प्रकाश नायक ह महाराजा चक्रधर के चित्र म  पुष्प अर्पित कर दीप प्रज्वलित करिस । ये अवसर म कलेक्टर यशवंत कुमार, पुलिस अधीक्षक संतोष सिंह, जिला पंचायत सीईओ सुश्री ऋचा प्रकाश चौधरी के संगे संग  गणमान्य नागरिक अऊ  जनसामान्य उपस्थित रिहिन ।