यातायात पुलिस ह स्कूल बस मन के फिटनेस के करिस जांच

नवनीत शुक्ला, मुंगेली। नगर म स्कूल बस , मैजिक आदि वाहन मन के फिटनेस चेकिंग बर यातायात पुलिस ह रविवार के एसएनजी कालेज ग्राउंड म सिविर लगाय रिहिस हे। जेमा सहर के सबो स्कूल के वाहन जांच बर आइन।
ये जाँच म गाड़ी म सेफ्टी, खिड़की, कैमरा, जाली, प्रदूषण, लाइसेंस, आदि के जांच करे गिस । आघू के रविवार म स्कूल म चलईया आटो मन के जांच करे जाही। यातायात प्रभारी सूबेदार महेश्वर सिंह ठाकुर ह बताइस के ” रविवार के स्कूल म चलइया स्कूल बस, मैजिक ल मिलाके 19 वाहन के जांच करे गिस हे। ये सबो वाहन के फिटनेस ठीक पाय गिस। आघू के रविवार म स्कूल म चलईया आटो मन के जांच होही ”