छत्तीसगढ़ बजट.. बिजली बिल हाफ, कोनो नवां कर नई

रायपुर. मुख्यमंत्री भूपेश बघेल ह शुक्रवार के अपन सरकार के पहिली बजट पेस करिस। 93 हजार करोड़ के बजट म उमन कोनो नवां टैक्स नइ लगाए हे। भूपेश सरकार ह अपन एक अउ बड़े चुनावी वादा पूरा करत हुए 400 यूनिट तक खपत वाले उपभोक्ता मन ल मार्च ले बिजली बिल हाफ करे के घोसना करिस हे।

एखर बर बिद्युत वितरन करइया कंपनी उपर पड़इया भार ल कम करे बर 400 करोड़ के प्रावधान करे गेहे। बजट म किसान मन बर कई घोषना करे गेहे।  पुलिस कर्मी ल बड़े सउगात देत हुए पुलिस भत्ता बर 45 करोड़ के प्रावधान करे गेहे। एखर संग ही छग म 2 हजार पुलिसकर्मी मन के  भर्ती होही।

खाद्यान्न योजना के तहत अब गरीब परिवार मन ल  35 किलो चावल प्रति परिवार ल देय बर  4 हजार करोड़ रुपिया के प्रावधान बजट म करे गेहे। एखर  पहिली के सरकार हर महीना प्रति व्यक्ति सात किलोग्राम चावल बांटत रहिस हे।

नरवा, घुरवा, गरवा, बाड़ी के नारा के तहत जल योजना, जैविक खाद्य ल बढ़ावा देय के संगेच  पशुधन व सब्जी के खेती ल बढ़ावा देय के प्रवाधान करे गेहे। बजट म विधायक निधि बढ़ाए के प्रावधान घलो करे गिस।

विधायक निधि एक करोड़ ले बढ़ाके 2 करोड़ करे के प्रावधान हे। एखर संग ही प्रदेस म 5 नए फूड पार्क बनाए जाही।  छात्रवृत्ति म वृद्धि करे जाही। मध्यान भोजन बनाइया मन के वेतन बढ़ गेहे। कृषि विभाग के नाम बदलही। सरकार ह कृषि बजट म 21,597 करोड़ के प्रावधान करिस हे। जे पाछू के बजट के तुलना म 10 गुना जादा है।