छत्तीसगढ़ के बेटी ह करिस अइसन काम मंत्री ह घलो होगे हैरान

रायगढ़। रायगढ़ जिला के बेटी मन ह सब्बो क्षेत्र म सफलता के परचम लहरावत हे, अइसन ही एक झन बेटी याशी जैन हे। ओखर पिता ह पंजाब नेशनल बैंक में काम करथे अउ मां ह गृहणी ये। याशी ह अपन पढ़ई के संग-संग पहाड़ चढ़े के शौक जेला पर्वतारोही कहिथे वोला वो ह अपन कैरियर बना ले हे अउ आज जिला अउ हमर प्रदेश के साथ राष्ट्रीय स्तर पर अपन परिवार के नाम ल रोशन करत हे।

पर्वतारोही याशी जैन ह शनिच्चर के दिन अपन परिवार संग म उच्च शिक्षा मंत्री उमेश पटेल से मिलिस। याशी ह यूरोप के माउंट एल्ब्रस पर्वत पहाड़ म चढ़े  बर जावत हे। ये  पहाड़ ह यूरोप के सबसे ऊंचा पहाड़ ये  जेन ह  5600 मीटर हे। ये ह मृत ज्वालामुखी पर्वत के नाम से जाने जाथे।  मंत्री उमेश पटेल ह ओखर उज्जवल भविष्य बर कामना करिस अउ ये साहस वाले काम बर ओला शुभकामना दिस हे । ओ ह कहिन कि पर्वतारोहण ह चुनौतीपूर्ण अउ साहस वाले काम हे। ये काम ल कर अपन प्रदेश अउ देश के नाम ल रोशन करत हे। पटेल ह ओखर माता-पता ल घलो शुभकामना दे के कहिन कि बेटी मन ल आघू बढ़ाय म अइसन परयास ह कारगार हे। ये मुलाकात ह नंदेली स्थित उच्च शिक्षा अउ युवा कल्याण मंत्री उमेश पटेल के घर म होईस, ये मौका म पटेल ह शासन तरफ से याशी जैन ल सब्बो सुविधा दिलाए के आश्वासन दिस अऊ कहिन कि हमर राज्य के युवा मन बर कांग्रेस सरकार ह अच्छा काम करे बर प्रणबद्ध हे। ये मौका में याशी के पिता अखिलेश जैन अउ माता अल्का जैन भी साथ म रिहिस।