Chhattisgarh: शहीद पुलिस अधिकारी अउ जवान मन ल मिलही 80 लाख के आर्थिक सहायता, सीएम ह दे हे निर्देश
जय जोहार…. (Chhattisgarh) बीजापुर म नक्सली-पुलिस मुठभेड़ म शहीद हुये पुलिस अधिकारी अऊ जवान मन ल न्यूनतम 80 लाख रुपया के आर्थिक सहायता मिलही। संगेसंग परिवार के एक सदस्य ल अनुकंपा नियुक्ति घलो मिलही। सीएम भूपेश बघेल ह अधिकारी मन ल आर्थिक सहायता अउ अनुकंपा नियुक्ति के प्रक्रिया ल जल्दी पूरा करे के निर्देश दे हे।
आर्थिक सहायता के तहत (Chhattisgarh) राज्य शासन के तरफ ले विशेष अनुग्रह अनुदान, सामूहिक विकल्प विशेष अनुदान, शहीद सम्मान निधि, समूह बीमा राशि अउ दूसर आर्थिक सहायता राशि ल प्रदान करे जाही।
ए मुठभेड़ म केंद्रीय अर्द्ध सैनिक बल के शहीद पुलिस अधिकारी अउ जवान मन ल (Chhattisgarh) राज्य शासन के तरफ ले विशेष अनुग्रह अनुदान अउ सामूहिक बीमा विकल्प विशेष अनुदान के रूप म कुल 45.40 लाख रुपया के आर्थिक सहायता प्रदान करे जाही। केंद्रीय अर्द्ध सैनिक बल के शहीद अधिकारी अउ जवान मन ल अनुकंपा नियुक्ति अउ दूसर आर्थिक सहायता के संबंध म अग्रिम कार्यवाही अर्द्ध सैनिक बल के तरफ ले करे जाही।
