छत्तीसगढ़ गृह निर्माण एवं अधोसंरचना विकास मंडल के लोगो डिजाइन प्रतियोगिता ला मिलिस अभूतपूर्व प्रतिसाद
2700 प्रतिभागी मन ह भेजिन 3000 से जादा लोगो डिज़ाइन
रायपुर, छत्तीसगढ़ गृह निर्माण एवं अधोसंरचना विकास मंडल दुआर से आयोजित लोगो डिजाइन प्रतियोगिता ला प्रदेश के साथे-साथ गोटा देस भर से सुघर प्रतिसाद मिले हे। प्रतियोगिता के तहत तय आखिरी तारीख 20 मई 2026 तक कतीर 2700 प्रतिभागी मन के दुआर से ई-मेल के जरिया 3000 से जादा लोगो डिज़ाइन भेजे गे हन।
जानबा होवय कि राज सासन दुआर से “छत्तीसगढ़ गृह निर्माण मंडल” के नाम ला बदल के “छत्तीसगढ़ गृह निर्माण एवं अधोसंरचना विकास मंडल” करे गे हे। आवास एवं पर्यावरण मंत्री ओ.पी. चौधरी दुआर से विधानसभा मं रखे गे विधेयक ला विधानसभा से पास होय अउ राज्यपाल के मंजूरी मिले के बाद 24 अप्रैल 2026 ला राजपत्र मं छपवाय गिस।
मंडल के अध्यक्ष अनुराग सिंह देव ह बताइन कि नाम बदले के संग-संग मंडल के काम-काज के छेत्र ला घलो बढ़ाय गे हे। अब मंडल ह सिर्फ घर (आवास) निरमान तक सीमित नइ राही, बल्कि सड़क, पुल अउ दूसर अधोसंरचना बिकास के काम मन ला घलो पूरा करही। संग ही राज के बाहिर घलो अधोसंरचना परियोजना मन मं काम करे के मोखा मिले से मंडल के काम करे के ताकत अउ आर्थिक हाल अउ जादा मजूद होही।
एही बुता मं 12 मई 2026 ला रखे गे समय-सीमा के बइठक मं मंडल के आयुक्त अवनीश कुमार शरण दुआर से मंडल के नवा सरूप अउ बढ़े हुए काम-काज ला देखाए बर नवा लोगो डिजाइन बर प्रतियोगिता कराय के निरदेस दिये गे राहय। प्रतियोगिता मं आम लोगन, कलाकार मन, डिजाइनर मन अउ संस्था मन से नवा नाम अउ ओकर सोच के मुताबिक लोगो डिज़ाइन मंगाए गे राहय।
प्रतिभागी मन ला अपन डिजाइन कॉन्सेप्ट के संग CDR, PDF, PNG अउ JPEG फॉर्मेट मं ई-मेल के जरिया अपन प्रविष्टि मन ला भेजे के मोखा दिये गे राहय।
मंडल दुआर से चुने गे सबले सुघर लोगो के बनाइया ला 2.50 लाख रुपिया के इनाम राशि दिये जाही। मिले प्रविष्टि मन के जांच (स्क्रूटनी) अउ चुनाव के बूता तीन चरन मं पूरा होही। एकर बर मंडल दुआर से 5 सदस्य मन के समिति बनाए गे हे। समिति ह तकनीकी जांच के बाद आखिरी चुनाव बर सिफारिस करही।
चुनाव के बूता पूरा होय के बाद मंडल के नवा लोगो ला सबो बर जाहर (सार्वजनिक) करे जाही अउ चुने गे लोगो के बनाइया ला 2.50 लाख रुपिया के इनाम दिये जाही।
