chhattisgarh के श्रम विभाग ल ई-श्रमिक सेवा बर मिले हे गोल्डन अवॉर्ड, सीएम भूपेश बघेल ह श्रमिक अउ विभागीय अधिकारी-कर्मचारी ल दीन हे बधाई

जय जोहार…. छत्तीसगढ़ (chhattisgarh ) के श्रम विभाग ल ई-श्रमिक सेवा बर गोल्डन अवॉर्ड मिले हे । ई-गवर्नेंस के क्षेत्र म नवाचार बर भारत सरकार के प्रसासनिक सुधार अउ लोक सिकायत विभाग डहार ले छत्तीसगढ़ के श्रम विभाग ल ये अवार्ड प्रदान करे गेहे। मुख्यमंत्री भूपेश बघेल अउ श्रम मंत्री डॉ. शिव कुमार डहरिया ह गोल्डन अवॉर्ड मिले म श्रमिक अउ श्रम विभाग के सबो अधिकारी -कर्मचारी मन ल बधाई अउ सुभकामना दीन हे।

(chhattisgarh ) छत्तीसगढ़ के श्रम विभाग ल ई-गर्वनेंस बर राष्ट्रीय पुरस्कार 2020-21 बर युनिवर्सलाइजिंग एक्सेस इंक्लुडिंग ई-सर्विसेज श्रेणी म ई-श्रमिक सेवा बर गोल्डन अवॉर्ड दे गेहे। ए अवॉर्ड के संग 2 लाख रुपिया के रासि दे गेहे। ये पुरस्कार ल आज हैदराबाद इंटरनेसनल कन्वेंसन सेंटर हैदराबाद म आयोजित समारोह म केंद्रीय मंत्री कार्मिक, लोक सिकायत डॉ. जितेन्द्र सिंह ले छत्तीसगढ़ के श्रम विभाग के सचिव एलेक्स पॉल मेनन अउ श्रम विभाग के अधिकारी मन के टीम ह ग्रहण करीन ।