GST कलेक्शन ग्रोथ म छत्तीसगढ़ ल देश म मिले हे दूसर स्थान, पढ़ो पूरा खबर

जय जोहार…. सितंबर महिना म देश के आन राज्य के तुलना म जीएसटी (GST) कलेक्शन के मामला म छत्तीसगढ़ म दूसर सबले बड़का ग्रोथ दर्ज करे गे हे। छत्तीसगढ़ म पिछिले साल सितंबर महिना के तुलना म ए साल 2020 के सितंबर महिना म जीएसटी कलेक्टशन म 24 प्रतिशत के ग्रोथ दर्ज करे गे हे।

वर्ष 2019 के सितंबर महिना म छत्तीसगढ़ म जीएसटी कलेक्शन ह 1490 करोड़ रुपया रिहिन, जेन वर्ष 2020 के सितंबर महिना म कोरोना संकट के बावजूद बाढ़ के 1841 करोड़ रूपया हो गिस।

केन्द्रीय वित्त मंत्रालय ले जारी जीएसटी (GST) संग्रह के ताजा आंकड़ा के मुताबिक जम्मू-कश्मीर ह 30 प्रतिशत के टैक्स कलेक्शन ग्रोथ के संग पहला स्थान म हे। जबकि छत्तीसगढ़ 24 प्रतिशत के ग्रोथ के संग दूसर स्थान म हे।

(GST) राजस्थान म पिछिले वर्ष के तुलना म 17 प्रतिशत, हरियाणा म 15 प्रतिशत, दिल्ली म 7 प्रतिशत, गुजरात म 6 प्रतिशत, पंजाब म 5 प्रतिशत, मध्यप्रदेश म 4 प्रतिशत अऊ उत्तरप्रदेश म 0.05 प्रतिशत वृद्धि दर्ज करे गे हे।