छत्तीसगढ़ राज्य युवा महोत्सव 2024-25, पद्मश्री अनुज शर्माअउ मंत्री टंक राम वर्मा ह बांधिन समां
रायपुर। छत्तीसगढ़ राज्य युवा महोत्सव 2024-25 के दूसर दिन रायपुर साइंस कॉलेज मैदान म सांस्कृतिक प्रस्तुति ह दर्शक मन के दिल जीत लिस। रंगारंग कार्यक्रम ले सजे ए आयोजन म छत्तीसगढ़ी लोक परंपरा, समृद्ध संस्कृति, अउ आधुनिक संगीत के अनोखा संगम देखे ल मिलीस।
कार्यक्रम के शुरुआत म आरुग बैंड के शानदार प्रस्तुति ले होइन। पद्म अनुज शर्मा अउ उखर टीम ह छत्तीसगढ़ी पारंपरिक लोकगीत अउ आधुनिक धुन ले दर्शक मन ल मंत्रमुग्ध कर दिन। अनुज शर्मा ह अपन राम भजन “हरि अनन्त, हरि कथा अनन्ता” ले समां बांधिन। एखर बाद माता-पिता ल समर्पित “झन भूलव मां बाप ला” अउ लोकगीत “छैयाँ भुइयाँ ला छोडके जवईया” जइसन गीत ह दर्शक मन ल भावविभोर कर दिन। माते रइबे जइसन ददरिया गीत के सुरीला प्रस्तुति देके दर्शक मन ल झूमे म मजबूर कर दिन।
खेल अउ युवा कल्याण मंत्री टंक राम वर्मा ह घलो युवा महोत्सव म माइक थामिन अउ अपन प्रस्तुति ले महोत्सव के शोभा बढ़ाईन। ओमन ह प्रसिद्ध कवि लक्ष्मण मस्तूरिया के गीत ल अपन अंदाज म प्रस्तुत करके दर्शक मन के दिल जीत लिन। उखर गायन ह छत्तीसगढ़ी लोकगीत के सादगी अउ गहराई ल प्रदर्शित करिन।
एखर संग, दायरा बैंड ह अपन गीत “ऐसा जादू है मेरे बस्तर में” अउ “बैलाडीला बैलाडीला” के प्रस्तुती ले जम्मों झन ल मंत्रमुग्ध कर दिन। मुंबई के कलाकार अउ बस्तर के स्थानीय गायक मन के ए प्रदर्शन बस्तर के समृद्ध संस्कृति अउ अद्वितीय प्राकृतिक सौंदर्य ल अपन गीत के माध्यम ले जीवंत करिन। बैंड ह बस्तर के समृद्ध लोक संस्कृति अउ प्राकृतिक सौंदर्य ल मुंबई के कलाकारों के साथ बस्तर के स्थानीय कलाकार के अनूठा संगम देखके दर्शक भावविभोर हो गे।
कार्यक्रम के बेर छत्तीसगढ़ के लोक संस्कृति, पारंपरिक कला, अउ आधुनिक संगीत के अद्भुत मेल ह युवा महोत्सव ल एक यादगार आयोजन बना दिन। ए अवसर म वन मंत्री केदार कश्यप, खेल अउ युवा कल्याण मंत्री टंक राम वर्मा, विधायक अनुज शर्मा, राज्य युवा आयोग के अध्यक्ष विश्व विजय सिंह तोमर, जनप्रतिनिधिगण, विभिन्न क्षेत्र म उपलब्धि प्राप्त युवा बड़का संख्या म उपस्थित रहिन
