Raipur : पारंपरिक खेल ल बढ़ावा दे बर हरेक बछर होही छत्तीसगढ़िया ओलंपिक के आयोजन: भूपेश बघेल

जय जोहार । (Raipur) सीएम भूपेश बघेल ह किहीन कि छत्तीसगढ़ के पारंपरिक खेल ल बढ़ावा दे बर हरेक बछर छत्तीसगढ़िया ओलम्पिक के आयोजन ल सितम्बर-अक्टूबर महीना म करे जाही। मुख्यमंत्री ह आज राजधानी रायपुर के बलवीर सिंह जुनेजा स्टेडियम म छत्तीसगढ़िया ओलम्पिक के राज्य स्तरीय स्पर्धा के उद्घाटन समारोह ल संबोधित करत रिहीन। ए अवसर म मुख्यमंत्री ह छत्तीसगढ़िया ओलम्पिक की क्लस्टर, ब्लॉक, जिला, संभाग अउ राज्य स्तर के स्पर्धा म पहला, दुसरइया अउ तीसरइया स्थान म अवइया प्रतिभागी मन ल पुरुस्कार रासि प्रदान करे के घोसना करीन ।

मुख्यमंत्री ह टॉस कर छत्तीसगढ़िया ओलंपिक के राज्य स्तरीय कबड्डी खेल के प्रतियोगिता के सुरुवात करीन । उद्घाटन समारोह म खेल अउ युवा कल्याण मंत्री उमेश पटेल, खाद्य मंत्री अमरजीत भगत, छत्तीसगढ़ राज्य गृह निर्माण मंडल के अध्यक्ष कुलदीप जुनेजा, नगर निगम रायपुर के महापौर एजाज ढेबर, छत्तीसगढ़ राज्य पर्यटन मंडल के अध्यक्ष अटल श्रीवास्तव अउ राज्य युवा आयोग के अध्यक्ष जितेन्द्र मुदलियार उपस्थित रिहीन ।

ए अवसर म मुख्यमंत्री ह किहीन कि छत्तीसगढ़िया परम्परा में बसे हमर मन के खेल विधा ल संरक्षित करे अउ आगू बढ़ाय बर छत्तीसगढ़िया ओलंपिक के सुरुवात करे गेहे । छत्तीसगढ़िया ओलंपिक ल लेके पूरा प्रदेस म मनखे मन म अभूतपूर्व उत्साह देखे ल मिले हे । लईका ले लेके बड़े बुजुर्ग, महिला अउ युवा म ए खेल म पूरा उत्साह के संग हिस्सा लेहे । गांव-गंवई म खेल के प्रति एक अच्छा वातावरण निर्मित होइन । महिला मन ह घलो एमा बढ़-चढ़के हिस्सा लेहे ।