एवरेस्ट मा तिरंगा फहराय बर निकलिस छत्तीसगढ़ के बेटी, मुख्यमंत्री ह दीन सुभकामना
रईपुर. मुख्यमंत्री विष्णु देव साय ह जांजगीर-चांपा जिला के जवान पर्वतारोही अमिता श्रीवास ला ओकर आघू के माउंट एवरेस्ट अभियान बर गाड़ा-गाड़ा सुभकामना दीन।
मुख्यमंत्री श्री साय ह आज राजधानी रईपुर के मुख्यमंत्री निवास मा पर्वतारोही अमिता श्रीवास ले मुलाकात के बेरा मा कहिन कि— आघू 9 अप्रैल के अमिता दुनिया के सबले ऊंच चोटी माउंट एवरेस्ट मा तिरंगा फहराय के संकल्प के संग काठमांडू बर रवाना होवत हे। ये ह सिरिफ़ एक झन के कामयाबी के जात्रा नो हे, भल्कुन पूरा छत्तीसगढ़ के आस, साहस अउ आत्मविश्वास के उड़ान आय।
ओमन कहिन कि अमिता के ये अभियान ये बात के परमान आय कि यदि संकल्प अटल होवय, त कोनो भी ऊंचाई असंभव नइ रहय। प्रदेश के बेटी मन आज हर क्षेत्र मा अपन गुन अउ मेहनत ले नवा पहिचान बनावत हें अउ छत्तीसगढ़ के मान बढ़ावत हें।
मुख्यमंत्री श्री साय ह बताइन कि अमिता श्रीवास ह बछर 2021 मा अंतरराष्ट्रीय महिला दिवस के मउका मा माउंट किलिमंजारो ला फतह करके पहिली ही अपन ताकत अउ हिम्मत के परिचय दे चुके हे। ओकर ये लगातार कोसिस ह न केवल एक उपलब्धि आय, भल्कुन प्रदेश के युवा पीढ़ी, खास करके बेटी मन बर एक जिंयती प्रेरणा आय।
ओमन भरोसा जताइन कि अमिता अपन ये साहसिक अभियान मा सफलता पा के दुनिया के सबले ऊंच चोटी मा देश के तिरंगा फहराही अउ छत्तीसगढ़ के संग पूरा राष्ट्र के गौरव बढ़ाही।
मुख्यमंत्री ह अमिता श्रीवास ला ए बड़े अभियान बर प्रदेशवासी मन कोती ले हार्दिक सुभकामना देवत हुए ओकर उज्जर भविष्य के कामना करिन।
