छत्तीसगढ़ के आजीविका मॉडल ह पूरा देस बर प्रेरणादायी– केंद्रीय राज्य मंत्री श्री पासवान
केंद्रीय राज्य मंत्री कमलेश पासवान ह सेरीखेड़ी म ‘अजा परियोजना’ अऊ ‘पिंक दीदी’ नवाचार के देखरेख करिन
महिला समूह के आर्थिक मजबूती के करिन सराहना
रायपुर, केंद्रीय ग्रामीण विकास राज्य मंत्री कमलेश पासवान ह आज रायपुर जिला के सेरीखेड़ी म बने ‘मल्टी यूटिलिटी सेंटर’ के दौरा करिन। राष्ट्रीय ग्रामीण आजीविका मिशन (बिहान) के तहत चलत ये केंद्र म ओमन महिला स्व-सहायता समूह कोति ले करे जावत नवा काम अऊ आजीविका के साधन के बारीकी ले निरीक्षण करिन। ए दौरान ओमन खास करके महिला कोति ले चलत ‘अजा’ (AJA) परियोजना अऊ बाजार ले जुड़ाव के बड़ाई करिन अऊ एला पूरा देस बर एक ठन सीखे लायक मॉडल बताइन।
अजा परियोजना: वैज्ञानिक पशुपालन अऊ मजबूत बाजार
मंत्री श्री पासवान ह बकरी पालन के एकीकृत मॉडल ‘अजा’ के काम-काज ला देखिन। ओमन कहिन कि ये योजना ह न केवल ग्रामीण परिवार के कमाई ला बढ़त हे, बल्कि वैज्ञानिक तरीका ले पशुपालन ला घलो नवा रद्दा देखावत हे। आधुनिक शेड, समय म टीका लगाना, पशु बीमा, ऑनलाइन देखरेख अऊ जैविक खाद बनाय कस व्यवस्था मन ले गांव के अर्थव्यवस्था म सुग्घर बदलाव आये हे। ओमन कहिन कि समूह कोति ले बनाय सामान बर बाजार के सुबिधा ह आन राज्य मन बर घलो सीखे लायक हे।
पिंक दीदी अऊ बिजनेस दीदी: आत्मनिर्भर भारत के नवा पहिचान
निरीक्षण के बखत मंत्री ह नवा रायपुर म चलत ई-ऑटो सेवा “प्रोजेक्ट पिंक दीदी” के अब्बड़ सराहना करिन। ओमन ये काम ले जुड़े महिला ले गोठिया के उंखर अनुभव जानिन अऊ कहिन कि ये पहल ह पर्यावरण ला बचाय के संग महिला मन ला आर्थिक रूप ले आत्मनिर्भर बनावत हे। बकरी पालन के संग ओमन बिजनेस दीदी, मशरूम उत्पादन अऊ खेती ले जुड़े आन काम मन ला घलो देखिन।
घर सम्हालने वाली माइलोगन अब बनीं बोर्ड ऑफ डायरेक्टर
मंत्री श्री पासवान ह ‘कृषक उत्पादक समूह’ (FPO) के बोर्ड ऑफ डायरेक्टर महिला मन ले मयारू चर्चा करिन। ए दौरान दीदी मन ह बताइन कि कइसे ओमन घर के चउखट ले निकल के आज एक बड़े संगठित बियोपार के अगुवाई करत हें। मंत्री ह महुआ ले बने कुकीज (बिस्कुट) के सवाद चखिन अऊ दीदी मन के हुनर के तारीफ करत कहिन कि असंगठित क्षेत्र ला संगठित करके फायदा कमाना ही असली सशक्तिकरण आय।
अधिकारी मन ला योजना ला बढ़ाय के निर्देश
केंद्रीय राज्य मंत्री ह छत्तीसगढ़ के आजीविका मॉडल ला आन राज्य बर प्रेरणा के स्रोत बताइन। ओमन अधिकारी ला ये योजना ला अऊ जादा बढ़ाय बर कहिन। ओमन अधिकारी अऊ महिला समूह ला बढ़िया काम बर बधाई दीन।
ये मौका म पंचायत सचिव भीम सिंह, कलेक्टर गौरव सिंह, जिला पंचायत सीईओ कुमार बिस्वरांजन अऊ आन विभागीय अधिकारी मौजूद रहिन। अंत म मंत्री ह कहिन कि छत्तीसगढ़ के ग्रामीण आजीविका मॉडल ह ‘आत्मनिर्भर भारत’ के दिसा म एक ठन मजबूत कदम आय।
