मिस ब्यूटीफुल ऑफ सेंट्रल इंडिया तान्या ह बन गे हे छॉलीवुड के धड़कन

जयजोहार. छत्तीसगढ़ी सिनेमा म तान्या तिवारी वो उभरत अदाकारा हरे जेन ह काफी कम बेरा म अपन बेहतर जगह ल हासिल करे हे। मॉडलिंग ले बड़े पर्दा म एंट्री करईया तान्या ह पहिली 2015 के मिस ब्यूटीफुल ऑफ सेंट्रल इंडिया घलो रह चुके हे। 2016 म “बही तोर सुरता म“ फिलिम ले छॉलीवुड म कदम ओहा रखिस अऊ आज ओखर किरदार ल लोगन मन से खूब सराहना मिलत हे।

तान्या तिवारी ह मूलत: भोपाल के रहवईया ऐ। भोपाल के कॅरियर कॉलेज ले माइक्रो बॉयोलॉजी म डिग्री ले के बाद होटल मैनेजमेंट म पढ़ाई घलो कर चुके हे। तान्या बताथे कि बचपन ले ही ओला फिलिम ल देखके लगाव हो गे रिहिस। इही वजह हे कि ओहा अपन कैरियर के रूप म फिलिम ल चुने में ज्यादा समय नई लागिस। अपन अभिनय म परिपक्वता लाए बर तान्या ह भोपाल के थिएटर ले घलो जुड़े रिहिस। एखर संगे-संग साड़ी अऊ ज्वैलरी बर मॉडलिंग घलो करत रिहिस। तान्या के पंख ल परवाज अऊ तब ज्यादा मिलिस जब ओहा मिस ब्यूटीफुल ऑफ सेंट्रल इंडिया-2015 चुने गिस। एखर बाद ले ओला फिलिम के ऑफर अवई शुरू हो गे।

तान्या के पहिली भोजपुरी फिलिम “इंसाफ बनल कोहराम“ हरे, जेखर निर्देशन दिल्ली के संजय दयाली ह करे हे। हालांकि ओ फिलिम ह अभी तक रिलीज नई हो पाए हे। 2017 के आखिरी म फिलिम के रिलीज होए के उम्मीद हे। तान्या ह अशरफ़ अली के हिन्दी एल्बम “न जाने तू“ म घलो अभिनय करे हे।

भोजपुरी सिनेमा म एंट्री के बाद तान्या के रद्दा ह छॉलीवुड बर आसान हो गे। निर्देशक धमेंद्र चौबे के “बही तोर सुरता म“ ले ओखर छत्तीगसढ़ी सिनेमा म एंट्री होईस। ऐ फिलिम ह 2016 म रिलीज होईस। ऐ फिलिम म तान्या अपन अभिनय अऊ अदा के जलवा बगराए में कामयाब रिहिस। इही मेर ले ओखर रास्ता छत्तीसगढ़ी सिनेमा म आसान हो गे। ऐखर बार निर्देशक प्रिंस विकास वर्धन के “तोर मोर यारी“ म तान्या ह मुख्य भूमिका म नजर आहि जेन ह जून जल्द ही रिलीज होवईया हे। एखर संगे-संग कोयला, नाग अऊ अर्जून, आशिक मया वाले म घलो तान्या ह मुख्य भूमिका म नज़र आही। तान्या के कहना हे कि लोगन मन ओला एट्‌यीट्यूड वाली लड़की समझथे लेकिन ओहा विनम्र स्वभाव अऊ डाउन टू अर्थ हे।