CM Bhupesh Baghel ह प्रदेस म बेरोजगारी भत्ता योजना के करीन सुरुवात, पढ़व
जय जोहार। सीएम भूपेश बघेल (CM Bhupesh Baghel) ह आज रायपुर के अपन निवास कार्यालय ले प्रदेश म बेरोजगारी भत्ता योजना के सुभारंभ करीन। ए मउका म मुख्यमंत्री ह चार झन पात्र बेरोजगार युवा ल बेरोजगारी भत्ता स्वीकृति आदेस घलो प्रदान करीन । ए अवसर म मुख्यमंत्री ह किहीन कि बेरोजगारी भत्ता योजना ल वोहा युवा के हित म विधानसभा सत्र म घोसना करे रिहीन। आज वित्तीय बछर के पहले दिन ओला लागू घलो करत हन।
मुख्यमंत्री श्री बघेल ह किहीन कि एक अप्रेल ले बेरोजगारी भत्ता बर पंजीयन प्रक्रिया सुरु हो गेहे । मुख्यमंत्री ह किहीन कि अप्रेल माह के कोनो घलो दिन बेरोजगारी भत्ता बर पंजीयन अउ पात्र होय म एक अप्रेल ले ही बेरोजगारी भत्ता प्रदान करे जाही । सीएम ह किहीन कि युवा हमेसा बेरोजगार नई रहे, एखर बर ओखर रोजगार मूलक प्रसिक्षण दे के घलो योजना बनाए गेहे ।
ए मउका म कृषि मंत्री रवीन्द्र चौबे ह किहीन कि मुख्यमंत्री ह युवा बेरोजगार बर महत्वपूर्ण अउ महत्वकांक्षी योजना सुरू करे हे, जेन प्रदेस के बेरोजगार युवा ल अपन भविष्य संवारने के संबल मिलही । ए मउका म अपर मुख्य सचिव सुब्रत साहू समेत विभागीय सचिव घलो उपस्थित रिहीन ।
