CM Bhupesh Baghel ह आज ले बस्तर प्रवास म, बस्तर वासी मन ल देही 133 करोड़ रुपिया के 98 ठीन विकास काम के सौगात
जय जोहार। सीएम भूपेश बघेल (CM Bhupesh Baghel) ह 25 अउ 26 जनवरी के अपन दो दिन के बस्तर प्रवास म रही। जगदलपुर म गणतंत्र दिवस के मुख्य समारोह म सामिल होय बर बस्तर पहुंचत मुख्यमंत्री ह अपन दो दिवसीय प्रवास के दउरान 25 जनवरी के गिरोला म आयोजित कार्यक्रम म लगभग 133 करोड रुपिया के 98 ठीन विकास काम के भूमिपूजन अउ लोकार्पण करही ।
कार्यक्रम के अनुसार सीएम ह जगदलपुर के धरमपुरा म आयोजित छात्रावासी विद्यार्थी मन के संभागीय सम्मेलन म घलो सामिल होही। एखर बाद लामनी पार्क म निर्मित पक्षी विहार अउ डोंगाघाट म बायोगैस ले संचालित विद्युत निर्माण गृह के सुभारंभ करही । मुख्यमंत्री ह 26 जनवरी के लालबाग म आयोजित गणतंत्र दिवस समारोह म सामिल होके ध्वजारोहण करही अउ सिरहासार चौक स्थित शहीद स्मारक म शहीद ल श्रद्धांजलि अर्पित करही । एखर बाद आमागुड़ा चौक म पुलिस स्मारक स्थल अउ चैक के उन्नयन काम के सुभारंभ करही । मुख्यमंत्री ह ए दउरान तुरेनार म ग्रामीण औद्योगिक पार्क के अवलोकन घलो करही ।
मुख्यमंत्री भूपेश बघेल ह 25 जनवरी के गिरोला म आयोजित कार्यक्रम म बस्तर वासी मन ल लगभग 133 करोड़ रुपिया के लागत के 98 ठीन विकास काम के सौगात देही । सीएम ह कार्यक्रम म 68 करोड़ 42 लाख 80 हजार रुपिया के 27 ठीन काम के लोकार्पण अउ 65 करोड़ 18 लाख 40 हजार रुपिया के 71 ठीन विकास काम के भूमिपूजन करही ।
