रायपुर। मुख्यमंत्री डॉ. रमन सिंह ह काली अंतर्राष्ट्रीय ओलम्पिक दिवस के अवसर म प्रदेश म खेल मन ल बढ़ावा देहे बर कई ठन खेल संघ मन ल अऊ जादा सक्रियता के संग काम करे के आव्हान करिन। मुख्यमंत्री इहां अपन निवास म छत्तीसगढ़ ओलम्पिक एसोसिएशन के प्रतिनिधि मंडल मन ले चर्चा करत रहिन। उमन प्रदेश के खिलाड़ी मन, छत्तीसगढ़ ओलम्पिक एसोसिएशन के पदाधिकारि मन अऊ कई ठन खेल संगठन के पदाधिकारि मन ल अंतर्राष्ट्रीय ओलम्पिक दिवस के बधाई अउ शुभकामना दीन। छत्तीसगढ़ ओलम्पिक एसोसिएशन के प्रतिनिधि मंडल मुख्यमंत्री ले सौजन्य मुलाकात बर ऊंखर रायपुर स्थित निवास कार्यालय म आए रहिन।
मुख्यमंत्री ह कहिन कि छत्तीसगढ़ ओलम्पिक एसोसिएशन, खेल संघ अऊ राज्य सरकार के प्रयास ले छत्तीसगढ़ म खेल मन के प्रति उत्साहजनक वातावरण निर्मित होय हे। राज्य सरकार कोति ले खेल अधोसंरचना के विकास के बहुत अकन काम करे गए हे। छत्तीसगढ़ के बहुत अकन खिलाड़ि मन ह राष्ट्रीय अउ अंतर्राष्ट्रीय स्तर म छत्तीसगढ़ के गौरव बढ़ाए हें। ओलम्पिक संघ के पदाधिकारि मन ह मुख्यमंत्री ल नीम अऊ बेल के पौधा भेंट करके ओ मन ल अंतर्राष्ट्रीय ओलम्पिक दिवस के बधाई अऊ शुभकामना दीन।
प्रतिनिधि मंडल ह मुख्यमंत्री ल बताइस कि अंतर्राष्ट्रीय ओलम्पिक दिवस के अवसर म छत्तीसगढ़ ओलम्पिक एसोसिएशन कोति ले सात दिन के स्वीमिंग कैम्प, स्क्वैश, ट्रायथलान, नौकायान अऊ वालीबाल खेल मन म प्रदर्शन मैच मन के आयोजन करे गए हे। आज विजेता खिलाड़ि मन ल एसोसिएशन के तरफ ले पुरस्कृत करे गए हे। प्रतिनिधि मंडल म भारतीय ओलम्पिक संघ के संयुक्त सचिव श्री विक्रम सिसोदिया संग डॉ. विष्णु श्रीवास्तव, संजय शर्मा, डॉ. आलोक दुबे, सर्वश्री मोहम्मद अकरम खान, साहीराम जाफर, विनय बैसवाड़े अऊ सुश्री नीता डुमरे संग छत्तीसगढ़ ओलम्पिक एसोसिएशन कार्यकारिणी अऊ कई ठन खेल संघ मन के बहुत अकन पदाधिकारी सामिल रहिन।
