केरल के पलक्कड़ म छत्तीसगढ़ के प्रवासी मजदूर के हत्या म मुख्यमंत्री साय ह जतायिन गहरा शोक

रायपुर। केरल के पलक्कड़ जिला म छत्तीसगढ़ के प्रवासी मजदूर रामनारायण बघेल, निवासी ग्राम करही, तहसील हसौद, जिला सक्ती, के संग होए दुर्भाग्यपूर्ण अउ अमानवीय घटना म मुख्यमंत्री विष्णु देव साय ह गहरा शोक अउ संवेदना व्यक्त करिन हे।

मुख्यमंत्री साय ह कहिन कि कोनो भी निर्दोष नागरिक के संग ए प्रकार के हिंसा सभ्य समाज के मूल्य के विपरीत हे अउ मानवता ल शर्मसार करइया हे। ओमन ह ए घटना ल अत्यंत पीड़ादायक बतात कहिन कि छत्तीसगढ़ सरकार पीड़ित परिवार के संग पूरा संवेदनशीलता के संग मजबूती ले खड़े हे।

मुख्यमंत्री साय ह पीड़ित परिवार ल ₹5 लाख के आर्थिक सहायता राशि देए के घोषणा करिन हे। संग ही मृतक के परिजन मन ल तत्काल केरल भेजे के व्यवस्था करे गिस हे। मुख्यमंत्री के निर्देश म रामनारायण बघेल के पार्थिव शरीर सम्मानपूर्वक उखर गृह ग्राम लाए बर जम्मों आवश्यक प्रबंध करे गिस हे। पार्थिव शरीर कल हवाई जहाज़ ले छत्तीसगढ़ लाए जाहि।

मुख्यमंत्री साय ह केरल सरकार ले अनुरोध करिन हे कि ए जघन्य अपराध म शामिल जम्मों दोषी के विरुद्ध कठोरतम कानूनी कार्रवाई सुनिश्चित करे जाए, ताकि भविष्य म ए प्रकार के अमानवीय घटना के पुनरावृत्ति न हो।

ओमन ह कहिन कि छत्तीसगढ़ सरकार अपन नागरिक मन के सुरक्षा, सम्मान अउ न्याय के प्रति पूरी तरह प्रतिबद्ध हे अउ ए कठिन समय म पीड़ित परिवार ल हर संभव सहयोग प्रदान करे जाहि।