CM Bhupesh Baghel ह रेलवे ओवर ब्रिज के करीन लोकार्पण

जय जोहार। सीएम भूपेश बघेल (CM Bhupesh Baghel) ह प्रदेसव्यापी भेंट-मुलाक़ात कार्यक्रम के दउरान महासमुंद-तुमगांव रोड के रेलवे ओवर ब्रिज के फ़ीता काटके लोकार्पण करीन । ए अवसर म गृह अउ ज़िला के प्रभारी मंत्री ताम्रध्वज साहू, संसदीय सचिव अउ विधायक महासमुंद विनोद चंद्राकर संग रिहीन ।

बहुप्रतीक्षित तुमगांव ओवरब्रिज आम जनता बर बेहद जरूरी रिहीन । ए रेलवे सेतु के बन जाय ले सहर वासी मन ल सरलग लगइया ट्रेफ़िक जाम अउ आय -जाय म होवइया दिक्कत ले छुटकारा मिल जाही । ज़िला के जनता ख़ासकर तुमगाँव डहार अउ महासमुंद डहार ले रोजाना जनता ल सरल,सुगम मार्ग मिलही । वर्तमान म रेलवे फाटक बंद के सेती जाम की स्थिति बन जात रिहीन । रेलवे ओवरब्रिज बन जाय ले ओमन ल एखर ले निजात मिलही अउ बेरा के घलो बचत होही ।

गौरतलब हे कि तुमगांव रेलवे ओवरब्रिज बन जाय ले महासमुंद के क़रीबन 35 हजार ले जादा आबादी ल सुविधा मिलही । प्राप्त जानकारी के अनुसार 40 करोड़ के लागत ले बन के तइयार होही । एमा भू-अर्जन के रासि सामिल नई हे । ओवरब्रिज के कुल लंबाई 616 मीटर अउ चौड़ाई 15 मीटर हे । रेलवे क्रॉसिंग ले महासमुंद के डहार 294 मीटर अउ तुमगांव के ओर 248 मीटर अउ रेलवे क्रॉसिंग के लंबाई 74 मीटर हे ।