जय जोहार। सीएम भूपेश बघेल (CM Bhupesh Baghel) ह आज अपन निवास कार्यालय म आयोजित कार्यक्रम म छत्तीसगढ़ के पहिला डिजिटल रेडियो स्टेशन ‘रेडियो संगवारी’ ल लॉन्च करीन । ए मउका म वोहा रेडियो संगवारी के संस्थापक अउ संचालक सहित पूरा टीम ल छत्तीसगढ़ के कला अउ संस्कृति ल व्यापक प्रचार-प्रसार के दिसा म एक ठन बेहतर परयास बतात हुए बधाई अउ सुभकामना दीन ।
मुख्यमंत्री श्री बघेल ह किहीन कि रेडियो संगवारी के माध्यम ले छत्तीसगढ़ी लोक कला, लोक संस्कृति अउ गीत-संगीत ल आम मनखे मन तक डिजिटल रेडिया स्टेशन के माध्यम ले पहुंचाय बर रेडियो संगवारी के स्थापना करे गेहे, मोला ये जानके बड़ अकन खुसी होइन हे । मोला बताए गेहे कि छत्तीसगढ़ के कला अउ संस्कृति ल एप के माध्यम ले पूरा दुनिया के मनखे मन तक पहुंचाए जाही, निश्चित रूप ले ये बड़ अकन ही सराहनीय परयास हे ।
ए अवसर म रेडियो संगवारी के संस्थापक राहुल शर्मा अउ सह-संस्थापक डॉ. हेमंत सिरमौर ह बताइन कि रेडियो संगवारी ल टू-जी इंटरनेट स्पीड म घलो आराम ले सुने जा सकत हे । कार्यक्रम म प्रोग्राम संचालक मनीष बघेल ह बताइन कि गूगल प्ले स्टोर में Radio Sangwari लिखके एला डाउनलोड करे जा सकत हे । ए अवसर म आर.जे. श्रेया, जगमीत सिंह, अनुज शर्मा अउ रेडियो संगवारी के सबो सदस्य उपस्थित रिहीन ।
No Comment! Be the first one.