जय जोहार। सीएम भूपेश बघेल (CM Bhupesh Baghel) ह आज अपन निवास कार्यालय म छत्तीसगढ़ राज्य के पहिला स्वप्न दृष्टा डॉ. खूबचंद बघेल के पुण्यतिथि के अवसर म ओखर छाया चित्र म माल्यार्पण अउ दीप प्रज्वलित कर के श्रद्धांजलि अर्पित करीन ।
ए अवसर म मुख्यमंत्री श्री बघेल ह किहीन कि डॉ. खूबचंद बघेल ह छत्तीसगढ़ राज्य के सबले पहिले सपना देखे रिहीन । वोहा अपन पूरा जिनगी समाज अउ किसान के कल्याण बर समर्पित कर दीन। सिक्षा, सहकारिता के क्षेत्र समेत कई सामाजिक आंदोलन म वोहा महत्वपूर्ण भूमिका निभाईन । भारतीय स्वतंत्रता संग्राम के दउरान खूबचंद जी ह छत्तीसगढ़ म राष्ट्रीय चेतना जागृत करे के महत्वपूर्ण काम करीन ।
डॉ. खूबचंद ह सामाजिक कुरीति म घलो कड़ा प्रहार करीन। वोहा पंक्ति तोड़ो आंदोलन चलाइन । करमछड़हा, जनरैल सिंह अउ ऊंच-नीच जइसे नाटक लिखके सामाजिक बुराई के खिलाफ जनजागृति फैलाईन। ओखर कृतित्व अउ व्यक्तित्व के प्रति सम्मान प्रकट करत हुए चिकित्सा क्षेत्र म डॉ. खूबचंद बघेल स्वास्थ्य सहायता योजना अउ कृषि के क्षेत्र म महत्वपूर्ण उपलब्धि अउ अनुसंधान ल प्रोत्साहित करे बर डॉ. खूबचंद बघेल सम्मान स्थापित करे गेहे।
