Chhattisgarh : सीएम भूपेश बघेल ह करीन राष्ट्रीय आदिवासी नृत्य महोत्सव अउ राज्योत्सव के तैयारी के समीक्षा, रईपुर म होही आयोजन

जय जोहार…. राजधानी रईपुर के साईंस कॉलेज मैदान म 28 अक्टूबर के राष्ट्रीय आदिवासी नृत्य महोत्सव के सुभारंभ होही। तीन दिन तक चलइया ए महोत्सव म देस अउ विदेस के आदिवासी नर्तक दल डहार ले रंगारंग प्रस्तुति दे जाही। राष्ट्रीय आदिवासी नृत्य महोत्सव म 7 देस के नर्तक दल समेत देस के 27 राज्य अउ 6 केन्द्र सासित प्रदेस के 59 आदिवासी नर्तक दल सामिल होही। ए नर्तक दल म करीबन 1000 कलाकार सामिल होही, जेमा 63 विदेसी कलाकार होही।

मुख्यमंत्री भूपेश बघेल ह आज अपन निवास कार्यालय म आयोजित उच्च स्तरीय बइठक म राजधानी रईपुर के साईंस कॉलेज मैदान म आयोजित होवइया राष्ट्रीय आदिवासी नृत्य महोत्सव अउ राज्योत्सव के तैयारी के समीक्षा करीन। (Chhattisgarh) सीएम बघेल ह आयोजन स्थल म करे जात तैयारी, विदेस अउ देश के आन राज्य अउ केन्द्र सासित प्रदेस ले अवइया आदिवासी नृत्य दल अउ अतिथि के रूके के व्यवस्था, परिवहन व्यवस्था, आने आने कारीकरम के रूपरेखा ल अंतिम रूप दीन हे।

बइठक म पर्यटन मंत्री ताम्र्र्रध्वज साहू, वन मंत्री मोहम्मद अकबर, संस्कृति मंत्री अमरजीत भगत, नगरीय प्रसासन मंत्री डॉ. शिवकुमार डहरिया, खेल अउ युवा कल्याण मंत्री उमेश पटेल, मुख्य सचिव अमिताभ जैन, (Chhattisgarh) मुख्यमंत्री के अपर मुख्य सचिव सुब्रत साहू, प्रमुख सचिव उद्योग मनोज कुमार पिंगुआ, संस्कृति एवं पर्यटन विभाग के सचिव अन्बलगन पी., जनसम्पर्क सचिव सिद्धार्थ कोमल सिंह परदेशी, जनसम्पर्क आयुक्त दीपांशु काबरा, पुलिस महानिरीक्षक आनंद छाबड़ा, संचालक संस्कृति विवेक आचार्य, छत्तीसगढ़ पर्यटन मण्डल के प्रबंध संचालक यशवंत कुमार, कलेक्टर रईपुर सौरभ कुमार अउ पुलिस अधीक्षक रईपुर प्रशांत अग्रवाल उपस्थित रिहीन।