कोमल सुभाव के मुख्यमंत्री साय के कड़ा रुख
- कोरिया के सहायक आयुक्त ला करिन निलंबित
- मुख्यमंत्री ह सूरजपुर, कोरिया अऊ एमसीबी जिला म पीये के पानी के समसिया अऊ स्कूल के परीक्षा परिणाम ला लेके जताइन नाराजगी
- सुघर राज तिहार म सूरजपुर, कोरिया अऊ एमसीबी जिला के अचानक दौरा
रायपुर, मुख्यमंत्री विष्णु देव साय ह सुघर राज तिहार के बेरा म आज सूरजपुर, कोरिया अऊ एमसीबी जिला के अचानक दौरा करके सरकारी योजना अऊ कार्यक्रम के भुइँया स्तर म का हाल हे, ओकर जांच-परख करिन। ए दौरान सिबिर म ओमन गांव के मनखे मन ले गजब मया अऊ दुलार के संग मिलिन अऊ धीरज रख के ओमन के दुख-पीरा ला सुनिन।
मुख्यमंत्री ह ए तीनों जिला म सुघर राज तिहार के जायजा लेय के बाद चिरमिरी म जिला के अधिकारी मन के समीक्षा बइठक लीन। मुख्यमंत्री ह बइठक म ए तीनों जिला के गांव वाले इलाका म पीये के पानी के समसिया अऊ स्कूल के परीक्षा परिणाम के हालत ला लेके एक डहर जहां भारी नाराजगी जताइन, वहीं दूसर डहर कोरिया जिला म किसान मन ला खाद बांटे म गड़बड़ी के मामला अगाड़ी आय म सहायक आयुक्त अऊ सहायक पंजीयक सहकारी संस्थाएं आयुष प्रताप सिंह ला तुरते निलंबित करे के निरदेस दीश। समीक्षा बइठक म मुख्यमंत्री के कड़ा रुख ला देख के सब अधिकारी मन सकपका गीन।
मुख्यमंत्री साय के सूरजपुर जिला के ग्राम रामपुर म रखाय जनसमस्या निवारण सिबिर म गांव के मनखी मन ले अपनत्व के संग मिलना, ओमन के समसिया ला सुनना, तेन्दूपत्ता बटोरे वाले माईलोगन मन ला अपन हाथ ले चरण पादुका (चप्पल) पहिराना, लइका मन के अन्नप्रासन अऊ ओमन के नामकरण करना, एक डहर जहां ओकर कोमल सुभाव ला देखाथे, त वहीं दूसर डहर सरकारी काम-काज म लापरवाही करे म अधिकारी मन ऊपर नाराजगी अऊ निलंबन के कारवाही ह कड़ा प्रशासनिक बेवस्था के सीधा सुबूत आय।
मुख्यमंत्री साय ह समीक्षा बइठक के बेरा म ए तीनों जिला म पीये के पानी के समसिया के मामला म कलेक्टर मन ला हर-हाल म पानी के किल्लत वाले इलाका म पीये के पानी के रोज के सप्लाय पक्का करे के कड़ा निरदेस दीश। ओमन कहिन के जे इलाका म पीये के पानी के कमी हे, ओहां टैंकर के दुवारा पानी के सप्लाय पक्का करना कलेक्टर मन के जिम्मेदारी आय। ए मामला म कतको गड़बड़ी होय म सीधे कलेक्टर मन ला जिम्मेदार माने जाही। मुख्यमंत्री ह तीनों जिला के स्कूल परीक्षा परिणाम के हालत ला लेके घलो नाराजगी जताइन अऊ कलेक्टर मन ला आघू के पढ़ाई के सत्र बर अउ सुग्घर कार योजना बनाय के संग ही स्कूल मन म पढ़ाई-लिखाई के बेवस्था ला चकाचक करे के निरदेस दीश। ओमन कहिन के स्कूल मन म पढ़ाई के बेवस्था ऊपर कड़ा नजर रखे जाय, ताकि परीक्षा परिणाम म सुधार हो सके।
मुख्यमंत्री ह बइठक म कलेक्टर ला मौसम के बेमारी मन ले बचे बर कार योजना बनाय के संग ही ओला सही तरीका ले लागू करे के निरदेस दीश। ओमन कहिन के बरसात ले पहिली सब पीये के पानी के साधन मन के साफ-सफाई अऊ ओकर क्लोरिनेशन जरुर कराय जाय, ताकि गंदा पानी के सेती होय वाले बेमारी मन ला रोके जा सके। मुख्यमंत्री ह कलेक्टर मन ला प्रधानमंत्री आवास योजना के निर्माण काम ला पूरा क्वालिटी के संग समय म पूरा कराय के निरदेस दीश। ओमन कहिन के निर्माण काम म कतको किसम के गड़बड़ी अऊ हितग्राही (योजना के लाभ पाय वाला मनखे) के परेशान होय के सिकायत मिलिस, त ओकर बर घलो कलेक्टर मन ला सीधे जिम्मेदार माने जाही।
मुख्यमंत्री साय ह ए तीनों जिला के अधिकारी मन के वर्चुअल समीक्षा बइठक चिरमिरी के एसईसीएल के तानसेन भवन ले लीन। बइठक म सुवास्थ्य मंत्री श्याम बिहारी जायसवाल, विधायक भईया लाल राजवाड़े, मुख्यमंत्री के प्रमुख सचिव सुबोध सिंह, बिसैस सचिव अऊ आयुक्त जनसंपर्क रजत बंसल के संग तीनों जिला के कलेक्टर, एसपी, डीएफओ, सीईओ जिला पंचायत अऊ दूसर अधिकारी मन मौजूद रीहिन।
Whats app – https://whatsapp.com/channel/0029VaPmGTXInlqS2WQAhw1n
Youtube – https://youtube.com/@jayjohar?si=AZDI5zciOCT3Oqhw
facebook – https://www.facebook.com/share/18GsFBTgfd/
