Chief Minister Slum Health Scheme: 46.23 लाख ले जादा मनखे मन ल मिले हे इलाज के सुविधा
जय जोहार। (Chief Minister Slum Health Scheme) मुख्यमंत्री भूपेश बघेल के पहल म छत्तीसगढ़ के शहरी क्षेत्र के स्लम बस्ती म रहवइया गरीब परिवार ल मुफत उपचार के सुविधा दे जावत हे । मुख्यमंत्री स्लम स्वास्थ्य योजना के माध्यम ले अब तक 46 लाख 23 हजार 554 मनखे मन ल इलाज के सुविधा मिले हे।
ए योजना के तहत अब पूरा राज्य के नगरीय क्षेत्र के स्लम बस्ती म चिकित्सक, पैरामेडिकल टीम, मेडिकल उपकरण अउ दवा ले लैस 120 मोबाइल मेडिकल यूनिट पहुंचके मनखे मन ल स्वास्थ्य सुविधा उपलब्ध करावत हे । ए योजना के माध्यम ले अब तक 11 लाख 35 हजार 511 मरीज मन के पैथालॉजी टेस्ट करे जा चुके हे । संग ही 39 लाख 31 हजार 344 ले जादा मरीज ल मुफत दवा घलो दे गेहे । नगरीय प्रसासन अउ विकास विभाग डहार ले संचालित ए योजना म अब तक राज्य के 169 नगरीय निकाय के स्लम बस्ती म उपचार बर 60 हजार 872 कैम्प लगाए जा चुके हे ।
गौरतलब हे कि राज्य के 14 नगर निगम क्षेत्र के स्लम बस्ती म रहवइया मनखे मन ल स्वास्थ्य सुविधा मुहैया कराए बर मुख्यमंत्री शहरी स्लम स्वास्थ्य योजना के पहला चरण के सुरुवात 01 नवम्बर 2020 के होए रिहीस । एखर तहत 60 मोबाइल मेडिकल यूनिट डहार ले स्लम बस्ती म जाके मनखे मन के स्वास्थ्य परीक्षण, उपचार अउ दवा वितरण के सुरुवात के गे रिहीस ।
31 मार्च 2022 के एखर विस्तार ल पूरा राज्य के सबो नगरीय निकाय क्षेत्र म करे गीस अउ 60 अउ नवा मोबाइल मेडिकल यूनिट सुरू करे गीस। अवइया दिन म नवा मोबाइल मेडिकल यूनिट के संख्या 150 हो जाही । जेखर ले शहरी क्षेत्र के गरीब अउ जरूरतमंद मनखे मन ल ओखर घर के तीर ही स्वास्थ्य सुविधा मिलही ।
