Chief Minister Urban Slum Health Scheme: 41.57 लाख ले जादा मनखे मन के होइन मुफत इलाज

जय जोहार । (Chief Minister Urban Slum Health Scheme) छत्तीसगढ़ म मुख्यमंत्री भूपेश बघेल के पहल ले शहरी क्षेत्र के स्लम बस्ती म रहवइया गरीब परिवार ल मुफ़त उपचार के व्यवस्था करे गेहे। मुख्यमंत्री शहरी स्लम स्वास्थ्य योजना के माध्यम ले अब तक 41 लाख 57 हजार 878 मनखे मन के इलाज मोबाइल मेडिकल यूनिट के चिकित्सा दल डहार ले स्लम बस्ती म मनखे मन के घर के तीर पहुंचके करे गेहे।

ए योजना के तहत अब पूरा राज्य के नगरीय क्षेत्र के स्लम बस्ती म चिकित्सक, पैरामेडिकल टीम, मेडिकल उपकरण अउ दवा ले लैस 120 मोबाइल मेडिकल यूनिट ह पहुंचके मनखे मन ल स्वास्थ्य सुविधा उपलब्ध करावत हे । ए योजना के माध्यम ले अब तक 9 लाख 75 हजार 255 मरीज के पैथालॉजी टेस्ट करे जा चुके हे । संगेसंग 35 लाख 25 हजार 895 ले जादा मरीज ल मुफत दवा घलो दे गेहे । लाभान्वित मरीज म 2 लाख 68 हजार 475 ले जादा मेहनत-मजदूरी करइया मनखे मन ल घलो मुफत ईलाज जांच सुविधा के फायदा उठाइन हे ।

मुख्यमंत्री शहरी स्लम स्वास्थ्य योजना के तहत अब तक राज्य के 169 नगरीय निकाय के स्लम बस्ती म 55 हजार 222 कैम्प लगाके मनखे मन के मुफत जांच अउ उपचार कर दवाई दे गेहे । गौरतलब हे कि राज्य के 14 नगर निगम क्षेत्र के स्लम बस्ती म रहवइया मनखे मन ल स्वास्थ्य सुविधा मुहैया कराय बर मुख्यमंत्री शहरी स्लम स्वास्थ्य योजना के प्रथम चरण के सुरुवात 1 नवम्बर 2020 के होए रिहीन । एखर तहत 60 मोबाइल मेडिकल यूनिट डहार ले स्लम बस्ती म जाके मनखे मन के स्वास्थ्य परीक्षण, उपचार अउ दवा वितरण के सुरूवात करे गे रिहीन ।