मुख्यमंत्री विष्णु देव साय ह सरगुजा सांसद अउ विधायक मन संग करिन बइठका, क्षेत्र म विकास बर करिन चर्चा
रायपुर। मुख्यमंत्री विष्णु देव साय ह मुख्यमंत्री निवास कार्यालय म सरगुजा संभाग के जम्मों विधायक अउ सरगुजा सांसद के संग बड़का बइठका करिन। बइठका म ओमन सरगुजा अंचल के विकास ल लेके सबके के संग मिलके काम करे के संकल्प दोहराइन।
मुख्यमंत्री साय ह बइठका म सांसद अउ विधायक मन ले क्षेत्र म विकास के जम्मों संभावना ल लेके अहम चर्चा करिन अउ सुझाव लिन। ओमन कहिन कि समूचे सरगुजा संभाग के विकास म हमर नजर हे अउ सरगुजा ल प्रगति के पथ म आघु ले जाए के संभावना म काम करत हन। हमर सरकार एक बेहतर कार्य योजना बर एला तैयार करत हे।
मुख्यमंत्री साय ह कहिन कि हमन विकसित छत्तीसगढ़ के जेन विजन तैयार करे हन, ओमा समूचे छत्तीसगढ़ के संग – संग हमर दुनों आदिवासी बहुल बस्तर अउ सरगुजा संभाग के अग्रणी भूमिका होही।
मुख्यमंत्री विष्णु देव साय ह जम्मों जनप्रतिनिधी मन ले चर्चा करिन अउ उखर क्षेत्र म चलत विकास कार्य के जानकारी लिन। ओमन ह नागरिक मन बर मूलभूत सुविधा ले जुड़े कार्य ल प्राथमिकता के संग पूरा करे अउ एखर सतत मॉनिटरिंग करे बर कहिन। मुख्यमंत्री ह कहिन कि हमन अपन विजन के अनुरुप विकास के काम ल लगातार जारी रखबो।
मुख्यमंत्री विष्णु देव साय ह बइठका म सरगुजा क्षेत्र म पर्यटन के संभावना ल लेके विशेष चर्चा करिन। अउ कहिन कि हमन ह छत्तीसगढ़ म पर्यटन ल बढ़ावा देय बर बड़का कदम उठाए हन। देश म पर्यटन के नक्शे म सरगुजा ल विशेष स्थान मिले हे, ए प्रयास हमन करत हन। हाल ही म अंबिकापुर एयरपोर्ट ले नियमित विमान सेवा के शुरुआत होए हे, जेखर ले नागरिक सुविधा बढ़े के संग-संग पर्यटन ल घलो बढ़ावा मिलही। मुख्यमंत्री ह समूचा सरगुजा संभाग म परिवहन के बेहतर सुविधा बर काम करे के बात कहिन। अउ कहिन कि यातायात ल सुगम बनाए बर सरगुजा ल अन्य इलाका ले बेहतर सड़क के माध्यम ले जोड़े जाहि। सड़क के जाल ले परिवहन सुविधा बेहतर होही अउ एखर ले सरगुजा के तेजी ले विकास घलो होही
