जय जोहार। सीएम भूपेश बघेल (CM Bhupesh Baghel) ह आज अक्ती तिहार अउ माटी पूजन दिवस, श्री भगवान परशुराम जन्मोत्सव कार्यक्रम, माता कौशल्या महोत्सव अउ ईद-उल-फितर समेत रायपुर जिला के कई ठन कार्यक्रम म सामिल होही । सीएम ह 22 अप्रैल के ही दुर्ग जिला के अंतर्गत होवइया सामूहिक आदर्श विवाह अउ मां कर्मा जयंती महोत्सव म घलो हिस्सा लेही ।
मुख्यमंत्री ह 22 अप्रैल के बिहनिया 10.10 बजे राजधानी रायपुर के ईदगाह भाठा मैदान म आयोजित ईद-उल-फितर कार्यक्रम म सामिल होही । एखर बाद सीएम ह बिहनिया 11 बजे इंदिरा गांधी कृषि विश्वविद्यालय पहुंचही , इंहा मुख्यमंत्री ह अक्ती तिहार अउ माटी पूजन दिवस- 2023 कार्यक्रम म सामिल होही । संग ही कृषक सभागार भवन, महात्मा गांधी उद्यानिकी अउ वानिकी विश्वविद्यालय कैम्प कार्यालय, नव निर्मित क्लस्टर क्लासरूम भवन के उद्घाटन करही ।
मुख्यमंत्री ह मंझनिया 3.10 बजे राजधानी रायपुर के पुलिस ग्राउण्ड हेलीपेड ले हेलीकॉप्टर डहार ले गातापार (बेल्हारी) ग्राम, पाटन बर रवाना होही । गातापार म मुख्यमंत्री ह सामूहिक आदर्श विवाह अउ विशाल कर्मा जयंती महोत्सव म सामिल होही . एखर बाद सीएम ह मंझनिया 4.35 बजे कुम्हारी बर रवाना होही । कुम्हारी म मंझनिया 4.55 बजे मुख्यमंत्री ह बाजार चौक स्थित मां कर्मा भवन म नगर इकाई संघ डहार ले आयोजित मां कर्मा जयंती महोत्सव म सामिल होही ।
मुख्यमंत्री ह संझा 6.10 बजे रायपुर पहुंचही, इंहा समता कॉलोनी स्थित मंगलम भवन अउ 6.50 बजे बैरन बाजार स्थित आशीर्वाद भवन म आयोजित श्री भगवान परशुराम जन्मोत्सव कार्यक्रम म सामिल होही । एखर बाद सीएम ह संझा 7.20 बजे चंदखुरी बर रवाना होही अउ संझा 7.50 बजे चंदखुरी म आयोजित तीन दिवसीय माता कौशल्या महोत्सव के सुभारंभ करही ।
No Comment! Be the first one.