मुख्यमंत्री स्वस्थ बस्तर अभियान बनिस जीवन रक्षक संजीवनी
- सुकमा जिला के 1 लाख 54 हजार 157 मनखे मन के स्वास्थ्य जांच पूरा
- नियद नेल्लानार के 39 मरीज ला जिला अस्पताल मं मिलिस बढ़िया इलाज
रायपुर . मुख्यमंत्री विष्णुदेव साय के अगुवई अउ कलेक्टर अमित कुमार के मार्गदर्शन मं सुकमा जिला मं मुख्यमंत्री स्वस्थ बस्तर अभियान के तहत स्वास्थ्य जांच अउ इलाज के काम तेजी ले चलत हे। ए अभियान के मुख्य उद्देश्य दूर-दराज अउ अंदरूनी इलाका के जरूरतमंद नागरिक ला समे मं डॉक्टरी सुभीता पहुँचाना हे। एही कड़ी मं कोंटा विकासखंड के दूरस्थ नियद नेल्लानार क्षेत्र के अरलमपल्ली, पोलमपल्ली, दोरनापाल, बगड़ेगुड़ा, रंगाईगुड़ा, कोलईगुड़ा अउ पेंटापाड़ जइसन गांव मन ले कुल 39 मरीज ला जिला अस्पताल सुकमा लान के ओमन के जांच अउ इलाज करे गिस।
जिला अस्पताल मं ए मरीज के बढ़िया तरीका ले जांच करके इलाज तय करे गिस, जेमां 16 मनखे मन ला चस्मा (प्रेसबायोपिक) दिये गिस अउ 8 मरीज के मोतियाबिंद के ऑपरेशन सफलतापूर्वक करे गिस। उहें नियद नेल्लानार के गोगुंडा पहाड़ी क्षेत्र ले 5 ‘हाई रिस्क’ (उच्च जोखिम) गर्भवती महिला मन ला सुरक्षित लान के जांच करे गिस अउ जरूरी डॉक्टरी सलाह के संग वापस भेजे गिस। एकर अलावा कोसागुड़ा ले 6 मरीज ला अल्ट्रासाउंड अउ खून चढ़ाय बर भेजे गे रहिस, जबकि 4 मरीज हाथ-गोड़ मं सूजन के समस्या ले परेशान रहिन, जेमन के इलाज करके राहत दिये गिस।
जिला अस्पताल ले मिले जानकारी के मुताबिक मुख्यमंत्री स्वस्थ बस्तर अभियान के तहत सुकमा जिला मं कुल स्वास्थ्य जांच के लक्ष्य 2,93,386 तय करे गे हे, जेमां ले अब तक 1,54,157 मनखे मन के स्वास्थ्य जांच पूरा हो चुके हे। जांच के बखत कुल 4990 मरीज ला मोतियाबिंद, मलेरिया, कुष्ठ, टीबी, खून के कमी, हाई रिस्क गर्भवती महिला, कुपोषित लइका, बीपी अउ सुगर जइसन बीमारी बर चिन्हारी करके प्राथमिक, सामुदायिक अउ जिला अस्पताल मं इलाज के सुभीता दिये जावत हे।
कलेक्टर अमित कुमार ह बताइन कि मुख्यमंत्री स्वस्थ बस्तर अभियान के माध्यम ले जिला के दूर-दराज अउ अंदरूनी इलाका तक बढ़िया स्वास्थ्य सेवा पहुँचाए के काम ला प्राथमिकता के संग करे जावत हे। हमर लक्ष्य हे कि कोनो भी जरूरतमंद नागरिक ह इलाज ले वंचित झन रहय। अभियान के तहत चिन्हारी करे मरीज ला समे मं जिला अस्पताल लान के जांच, इलाज, ऑपरेशन अउ जरूरी सुभीता दिये जावत हे।
मानवीय संवेदनशीलता अउ प्रशासनिक तेजी ला देखावत हुए सबो मरीज के इलाज पूरा होय के बाद ओमन ला सुरक्षित घर वापस भेजे के व्यवस्था घलो करे गिस। बिहनिया 6 बजे जिला अस्पताल मं 4 एम्बुलेंस लगाके मरीज ला नास्ता कराय गिस अउ फेर ओमन ला ओकर गांव तक पहुँचाए गिस। ए व्यवस्था ह ए बात के गवाह हे कि सरकार-प्रशासन ह दूर के इलाका मं रहइया मनखे मन के स्वास्थ्य के जरूरत ला गंभीरता ले लेवत हें अउ ओमन ला सम्मान अउ सुरक्षा के संग इलाज देवत हें।
