मुख्यमंत्री के पहल… लॉकडाउन के दौरान बच्चा मन के घर बइठे पढ़ाई बर आनलाईन पोर्टल पढ़ई तुंहर दुआर के करिन शुभारंभ
जय जोहार रायपुर…. मुख्यमंत्री भूपेश बघेल ह स्कूली बच्चा मन के घर म रह के पढ़े बर देश के सबले बड़ा आनलाईन पोर्टल म ले एक पढ़ई तुंहर दुआर के आज अपन निवास कार्यालय म शुभारंभ करिन। ए पोर्टल के जरिये लाखों छात्र ह बिना कोनो शुल्क के आनलाईन पढ़ाई ल कर सकही। मुख्यमंत्री बघेल ह कहिन कि लॉकडाउन के संग ही अवइया समय म बच्चा मन के निरंतर पढ़ाई म ए कार्यक्रम ह बहुत उपयोगी साबित होही। मुख्यमंत्री ह आनलाईन पोर्टल के शुभारंभ करत हुए तिल्दा के शाला के कक्षा आठवीं के छात्रा दामिनी अऊ दुर्ग जिला के पाटन विकासखंड के सेलूद प्राथमिक शला के शिक्षक मिलिंद ले आनलाईन बातचीत घलो करिस। ए अवसर म स्कूली शिक्षा मंत्री डॉ. प्रेम साय सिंह टेकाम, स्कूल शिक्षा विभाग के प्रमुख सचिव डॉ. आलोक शुक्ला, संचालक लोक शिक्षण संस्थान जितेंद्र कुमार शुक्ला उपस्थित रहिस।
छत्तीसगढ़ शासन के स्कूल शिक्षा विभाग ह एनआईसी के सहायता ले आनलाईन पढ़ाई बर एक पोर्टल तैयार करे गे हे। मुख्यमंत्री भूपेश बघेल ह आज एखर शुभारंभ करे हे। स्कूल शिक्षा विभाग के वेबसाइट सीजीस्कूलडाटइन म कक्षा एक ले 10 तक विद्यार्थी मन बर पढ़ाई के संसाधन ल एमा उपलब्ध कराए गे हे। जल्द ही कक्षा 11वीं अऊ बारहवीं के विद्यार्थी मन ल ए सुविधा ह उपलब्ध हो सकही।
