संप्रेक्षण गृह म गैंगबाजी: कर्मचारी मन ल बंधक बना के पांच अपचारी लईका हो गे फरार

दुर्ग. जिला के बाल संप्रेक्षण गृह ले पांच अपचारी लईका मन कर्मचारी ल बंधक बनाके फरार हो गे। लईका मन ह ए घटना ल ओ बेरा म अंजाम दिस जेन बेरा म कर्मचारी मन ओमन ल खाना दे बर पहुंचे रिहिन। उही बेरा म लगभग आधा कोरी लईका मन ह ओमन ले घेर लिन। लईका मन ओखर मन ले संप्रेक्षण गृह के कूची ल छीन लिन। अऊ मऊका पा के अपचारी लईका मन उहां ले फरार हो गे।

सोमवार के दिन भागे एक लईका ल ओखर घर ले वापिस लाए गिस। ऐ घटना ल लेके पुलगांव थाना म घलो शिकायत कराए गे हे। बताए जात हे कि इतवार के रात करीब 8.30 बजे दू केयर टेकर खाना दे बर रुम पहुचे रिहिन। उही बेरा म पांच अपचारी लईका मन कूची ल छीनके बरामदा नुमा कुरिया के बाहर ले कुंडी लगा दिस अऊ फरार हो गे।

फरार लईका मन मे ले तीन हत्या के मामला के आरोपी हाबे जबकि दू झन सामान्य अपराध म संप्रेक्षण गृह पहुंचे रिहिस। घटना के बाद ले पुलिस ल सूचना दे दे गे रिहिस। सोमवार के सुबह हत्या के आरोपी लईका भागके अपन घर चल दे रिहिस। परिजन मन के सूचना के बाद ओला वापस संप्रेक्षण गृह लाए गिन। फरार लईका मन के तलाश करे जात हे।