लॉकडाउन के वजह ले बच्चा मन के पढ़ाई नई रही अधूरी, शासन के ए एप के जरिये होही पढ़ाई

जय जोहार कोरिया…. कोरोना वायरस संक्रमण के रोकथाम बर करे गिस लॉकडाउन के चलत स्कूल ह लंबा समय ले बंद हे। एखर चलत ए आवश्यक हे कि घर मन म रहत हुए भी बच्चा मन ल पढ़े-लिखे अऊ सीखे के अवसर प्रदान करे जाए। ताकि बच्चा मन ह लॉकडाउन अऊ लंबा अवकाश के दौरान घलो सीखना जारी रख सके। इही कड़ी म कोरिया जिला म घलो शिक्षा विभाग ह अपन तैयारी ल दुरूस्त कर ले हे।

राजीव गांधी शिक्षा मिशन के सहायक कार्यक्रम समन्वयक राजकुमार चोपकर ह बताइस कि जिला के अंतर्गत शिक्षक मन ल टेलीग्राम एप के माध्यम ले तीन अलग-अलग ग्रुप बना के जोड़े गे हे, जेमा प्राइमरी, मिडिल, हाईस्कूल अऊ हायर सेकेंडरी शामिल हे। ए ग्रुप म विषय के एक्सपर्ट के तरफ ले वीडियो बना के अपलोड कर बच्चा मन ल शिक्षा दे जात हे। एखर संगेसंग वो हा छत्तीसगढ़ शासन के स्कूल शिक्षा विभाग के ऑनलाईन शिक्षा पोर्टल पढ़ई तुंहर दुआर के बारे म बताइस कि ए पोर्टल सीजीस्कूलडाटइन म उपलब्ध हे। ए पोर्टल म वर्तमान म कक्षा एक ले दस तक के पढ़ाई के संसाधन ह उपलब्ध हे। शिक्षक अऊ छात्र मन ल एखर ले जुड़े बर रजिस्ट्रेशन करना होही, जेखर बाद आईडी अऊ पासवर्ड के जरिये उपयोग करे जा सकही। पोर्टल म विषय ले संबंधित सामग्री ह उपलब्ध रही।

उल्लेखनीय हे कि छत्तीसगढ़ शासन के स्कूल शिक्षा विभाग ह एनआईसी के सहायता ले ऑनलाईन पढ़ाई बर एक पोर्टल तैयार करे हे, जेखर शुभारंभ सात अप्रैल के मुख्यमंत्री भूपेश बघेल ह करे रहिन। ए पोर्टल सबो बर नि:शुल्क हे अऊ सीजीस्कूलडाटइन म उपलब्ध हे।