ये सम्मान पवइया छत्तीसगढ़ के पहिली कलाकार बनिस तीजन बाई

रायपुर/दिल्ली.  शनिवार छत्तीसगढ़ बर गउरव के दिन हे. छत्तीसगढ़ के प्रसिद्ध अउ अंतरराष्ट्रीय पंडवानी गायिका तीजन बाई ल देस के दूसर उच्च नागरिक सम्मान ले नवाजा गस हे. ये सम्मान देस बर  असैनिक क्षेत्र मन म बहुमूल्य योगदान बर देय जाथे.

राष्ट्रपति रामनाथ कोविंद ह पंडवानी गायिका तीजन बाई ल पद्म विभूषण ले सम्मानित करिन. तीजन बाई ल राष्ट्रपति भवन म देस के पद्म विभूषन सम्मान ले नवाजे गिस. तीजन बाई ये पुरस्कार प्राप्त करइया प्रदेस के पहिली छत्तीसगढ़ी कलाकार हे.

भिलाई के गनियारी म होए रहिस जनम

तीजन बाई के जन्म 24 अप्रैल 1956 के भिलाई के गनियारी गांव म होय रहिस हे. उमन राज्य के पंडवानी लोक गीत-नाट्य के पहिली महिला कलाकार हवय. देस-विदेस म अपन कला के परदर्सन करइया तीजन बाई ल बिलासपुर विश्वविद्यालय ले डी लिट के मानद उपाधि ले सम्मानित करे गे हे.

कतको  पुरस्कार मन ले  नवाजे गिस

उमन ल बछर 1988 म भारत सरकार के तरफ ले पद्मश्री अउ 2003 म कला के क्षेत्र म पद्म भूषन सम्मान मिल चुके हे. 1995 उमन ल संगीत नाटक अकादमी पुरस्कार अउ 2007 म नृत्य शिरोमणि ले घलो सम्मानित करे जा चुके हे.