डड़सेना-कलार सामाज के शपथ ग्रहण संघरिन सीएम कहिन स्वास्थ्य, शिक्षा अऊ रोजगार ल ले के हमन करेन बड़का उदिम

समारोह म करे गिस गई बड़का घोसना सीएम कहिन समाज ह छत्तीसगढ़ के विकास म निभाए हे महत्वपूर्ण भूमिका

मुख्यमंत्री भूपेश बघेल ह आज केशकाल विकासखंड के ग्राम बेड़मा म आयोजित डड़सेना-कलार सामाज के संभाग स्तरीय शपथ ग्रहण समारोह म संघरिन। ओमन मां दंतेश्वरी, भगवान सहस्त्रबाहु, बहादुर कलारिन अऊ छत्तीसगढ़ महतारी के छायाचित्र म माल्यर्पण कर कार्यक्रम के सुरुआत करिन। ए बेरा म डड़सेना-कलार समाज के प्रतिनिधि मन मुख्यमंत्री बघेल ल समर्थन मूल्य म 65 प्रकार के वनोपज खरीदी बर मऊहा के फूल ले तौलके ओखर आभार जताईन। संगे-संग सामाजिक लोगन मन गजमाला पहिरा के मुख्यमंत्री के अभिवादन करिन। ए बेरा म मुख्यमंत्री ह कई बड़का घोसना घलो करिन।

मुख्यमंत्री बघेल ह समारोह ल संबोधित करत कहिन कि स्वास्थ्य, शिक्षा अऊ रोजगार ल लेके हमन ह बड़का-बड़का उदिम करे हन। देवगुड़ी, माता गुड़ी, पेन गुड़ी के निरमान करत हन। सगे-संग आदिवासी भाई मन के आस्था स्थल के कायाकल्प करत हन।  ओमन कहिन कि आदिवासी नृत्य महोत्सव के घलो हमन आयोजन करत हन जेमा जम्मो राष्ट्रीय-अंतरराष्ट्रीय कलाकार छत्तीसगढ़ पहुंचत हे। एखर ले हमर अलग पहिचान बने हे। एकरे संग ए ह हमर बर गरब के बात ए कि हाल ही म रायगढ़ म राष्ट्रीय रामायण महोत्सव के सफल आयोजन हमन करेन। छत्तीसगढ़ देश के पहिली राज्य कहे जिहां रामायण ल लेके अतेक बड़का आयोजन होए हे अऊ सिरिफ देस नहीं बिदेसी कलाकार मन घलो एमा संघरे रिहिन।

मुख्यमंत्री बघेल ह कहिन कि आर्थिक क्षेत्र म हमन कई बड़का फैसला ले हन। किसान के आवक बढ़ाए बर राजीव गांधी किसान न्याय योजना लागू करेन। किसान मन के कर्जा माफी करेन। एसो हमन किसान मन ले 15 क्विंटल के स्थान म 20 क्विंटल प्रति एकड़ धान खरीदबो। ओमन कहिन कि लॉक-डाउन जईसे बिपति के परिस्थिति म घलो हमन ह 17 रुपिया किलो के मऊहा ल 30 रुपिया किलो म बिसाए के उदिम कर वनांचल के लोगन मन ल आर्थिक स्थिरता दे हन। कोदो-कुटकी-रागी के समर्थन मूल्य म खरीदी के सुरुआत हमन करेन एखर ले किसान मन के आय म जबर वृद्धि होए हे। मक्का ल घलो समर्थन मूल्य म बिसाए जात हे।

मुख्यमंत्री बघेल ह कहिन कि लोगन मन ल जादा ले जादा रोजगार मिले इही हमर परयास हे। ओमन कहिन कि ए बतात मोला बड़ा खुसी होवत हे कि आज 500 ले जादा युवा मन ल नियुक्ति पत्र सौंपे गे हे। ओमन ल देस के बड़का सहर म बुता मिले हे, हमर युवा मन रोजगार पावत हे। मुख्यमंत्री कहिन कि युवा मन ल बेरोजगारी भत्ता घलो दे जावत हे जेखर ले ओमन अपन लक्ष्य ल आसानी ले पा सके। हमन पाछू के 2 महीना म 48 करोड़ रुपिया के बेरोजगारी भत्ता देके युवा मन ल सम्बल दे के बुता करे हन। मुख्यमंत्री आगू कहिन कि डड़सेना-कलार समाज ह घलो छत्तीसगढ़ के विकास म अपन महत्वपूर्ण भूमिका निभाए हे। ए समाज बड़ परिश्रमी है। ए बेरा म सीएम ह समाज के नव नियुक्त पदाधिकारी मन ल बधई दिन।

उद्योग मंत्री कवासी लखमा, विधानसभा उपाध्यक्ष संतराम नेताम, बस्तर सांसद दीपक बैज, कांकेर सांसद मोहन मंडावी, विधायक कोण्डागांव मोहन मरकाम, विधायक संजारी-बालोद संगीता सिन्हा अऊ कलार समाज के अध्यक्ष पुरुषोत्तम गजेंद्र  ह घलो ए कार्यक्रम ल सम्बोधित करिन। ए बेरा म विधायक नारायणपुर चंदन कश्यप, विधायक अनूप नाग, संभागायुक्त बस्तर श्याम धावड़े, पुलिस महानिरीक्षक सुंदरराज पी घलो मौजूद रहिन।  

समारोह म कई बड़का घोसना

• शासकीय दण्डकारण्य महाविद्यालय केशकाल ल पीजी कॉलेज के दर्जा दे के स्वीकृति।
• डडसेना कलार समाज बर केशकाल म सामुदायिक भवन के निर्माण कार्य के स्वीकृति जमीन उपलब्ध कराए के निर्देस
• बहीगांव में पुलिस चौकी के स्थापना
• ब्लॉक मुख्यालय विश्रामपुरी म विश्रामगृह निर्माण के स्वीकृति
• रामवन गमन पथ म संघरे प्रसिद्ध ऐतिहासिक धार्मिक स्थल गोबरहिन (गढ़धनोरा) ल विकसित करे के स्वीकृति
• बेड़मा म सामुदायिक भवन के स्वीकृति
• देवतरा, भर्रीपारा, बुडराडीही, पलोरा मार्ग के पुल-पुलिया के संगे-सग 7 कि.मी. सड़क निर्माण के स्वीकृति
• कोपरा भंवरदीग नदी म वृहद पुलिया निर्माण के स्वीकृति