छत्तीसगढ़ म कइसा हो लॉकडाउन-4, सीएम बघेल ह पीएम मोदी ल दे हे कई सुझाव, ए दुकान ल खोले के मांगिन अनुमति
जय जोहार…. मुख्यमंत्री भूपेश बघेल ह 17 मई के समाप्त होवइया लॉकडाउन के बाद आघू के रणनीति के संबंध म प्रधानमंत्री नरेंद्र मोदी ल पत्र लिख के कई सुझाव दे हे। प्रधानमंत्री नरेंद्र मोदी ह 11 मई के सब्बो राज्य के मुख्यमंत्री मन के संग वीडियो कांफ्रेंस आयोजित करे रहिस। जेमा मुख्यमंत्री मन ले लॉकडाउन के बाद आघू के रणनीति म सुझाव ल मांगे रहिस।
मुख्यमंत्री ह पत्र म सुझाव ल देत हुये लिखे हे कि अर्थव्यवस्था ल पटरी म लाये बर व्यापारिक अऊ वाणिज्यिक गतिविधि ल सावधानी ल बरतत हुये प्रारंभ करे जाना आवश्यक हे। एखर बर कंटेनमेंट जोन ल छोड़ के शेष सब्बो क्षेत्र म आवश्यक अऊ गैर आवश्यक वस्तु के बिक्री ल अनुमति दे जाना चाही। वाहन के बिक्री करइया सब्बो शो रूम अऊ वर्कशाप ल संचालन के अनुमति हो। सब्बो ई कामर्स बर अनुमति दे जा सकत हे। होटल व्यवसाय ल फिजिकल डिस्टेंस के पालन के शर्त म केवल रहवासी सुविधा बर उपलब्ध कराये ल अनुमति दे जा सकत हे। होटल म संचालित रेस्टोरेंट, बार अऊ स्पा आदि ल अभी अनुमति नई दे जाये। अइसने व्यक्तिगत सेवा देवइया सब्बो टेक्नीशियन, इलेक्ट्रीशियन, मैकेनिक, मिस्त्री आदि बर अनुमति दे जाना चाही। संगेसंग ओ मन ल अपन टूल्स, उपकरण अऊ आन सामग्री बर दुकान संचालन के घलो अनुमति देना चाही।
मुख्यमंत्री ह अपन पत्र म लिखे हे कि नगरीय क्षेत्र म घलो सब्बो निर्माण कार्य बर अनुमति ल फिजिकल डिस्टेंस के पालन के सर्त म देना चाही। एखर बर श्रमिक मन के परिवहन के व्यवस्था बर पास के अनुमति ल अनिवार्य करे जा सकत हे। राज्य ल ओखर अलग-अलग जिला ल रेड जोन, ऑरेंज जोन अऊ ग्रीन जोन म वर्गीकृत करे के अधिकार ह होना चाही। एखर बर पारदर्शी मापदंड ल केंद्र सरकार ह निर्धारित करे।
