सीएम भूपेश बघेल ह कवच मोबाइल एप के करिन शुभारंभ, अब एक क्लिक म मिलही कोरोना ले संबंधित सबो जानकारी
जय जोहार…. मुख्यमंत्री भूपेश बघेल ह आज इहां अपन निवास कार्यालय म कोरोना ले संबंधित शासकीय परामर्श, आदेश अऊ जानकारी ल तत्काल आम नागरिक मन तक पहुंचाए बर विकसित कवच मोबाइल एप के शुभारंभ करिन।
ए मोबाइल एप ल छत्तीसगढ़ शासन के स्वास्थ्य विभाग अऊ चिप्स के तरफ ले बनाए गे हे। ए एप म राज्य के संदिग्ध अऊ पुष्टि वाला कोरोना मामला के जानकारी रियल टाइम म डैश बोर्ड के माध्यम ले आम जनता बर उपलब्ध रही। एमा कोविड 19 ई पास बर आवेदन करे के सुविधा घलो हे। एप ले प्रदेशवासी मन ल अस्पताल अऊ नोडल अधिकारी मन के विवरण मिलही। संगेसंग नागरिक मन ल ओखर निवास के निकटतम अस्पताल के जानकारी मिलही, जिहां मरीज कोनो लक्षण के दशा म पहुंच सकत हे।
कोरोना जगरूकता बर विकसित कवच मोबाइल एप के प्रमुख विशेषता म छत्तीसगढ़, भारत अऊ वैश्विक आकड़ा के वास्तविक समय के डैश बोर्ड अऊ छत्तीसगढ़ म कोरोना अस्पताल के जानकारी शामिल हे। एमा कोरोना वायरस के रोकथाम बर आपातकालीन राहत कोष म दान करे के सुविधा, कोविड 19 ले संबंधित शासकीय आदेश अऊ कोरोना के लक्षण के जांच अऊ त्वरित स्व जांच के जानकारी घलो आसानी से मिल जाही। संगेसंग कोरोना के प्रति जागरूकता, यात्रा निर्देश, रोकथाम उत्पाद के जानकारी अऊ फेक न्यूज के जानकारी घलो मिलही।
