आज युवा कांग्रेस के प्रदेश कार्यकारिणी के बड़का बईठका होईस। जेमा 2023 के विधानसभा चुनई ल लेके मंथन करे गिस। बैठक म प्रदेश प्रभारी कुमारी सैलजा, यूथ कांग्रेस के राष्ट्रीय प्रभारी चंदन यादव, सहप्रभारी विजय जांगिड़, सीएम भूपेश बघेल, पीसीसी चीफ मोहन मरकाम ह पदाधिकारी अऊ कार्यकर्ता मन ल राजनीतिक पाठ पढ़ाईन।
ए बेरा म नेता मन ल समझाइस दे गिन। ओमन कहिन कि कोनों भी मुद्दा के ठीक तरह अध्ययन करव अऊ इतिहास ल पढ़व। सोशल मीडिया म का जवाब देना हे एखर ठीक ले तैयारी करव। मणिशंकर अय्यर के बयान के उदाहरण देत सीएम बघेल ह कहिन कि चुनाव ले पहिली संभलके बयान दे जाए। एखर बर पार्टी के बड़े नेता मन ले सलाह ले बर गोठ-बात जरूर करे जाए। ओखर बयान मन ल सुने जाए अऊ ओखर ले सीखे जाए। कईसे ओमन दिनचर्या के पालन करत हे, वईसने ही संगठन के बूता ल मजबूती ले करना हे।
मुख्यमंत्री ह कहिन कि भ्रामक सूचना मन के खंडन होना जरूरी होथे। अपन उपलब्धि के योजना मन के जानकारी होना जरूरी हे। सबो संगठन एक संग मिलके बुता करबो त भारतीय जनता पार्टी ल पछाड़ना बड़ आसान काम हे। सीएम भूपेश बघेल ह कहिन कि सोशल मीडिया म आजकल काखरो छवि बने नहीं फेर छवि बिगाड़े के बुता बड़ तेजी ले करत हे। एखर ले सचेत होना जरूरी हे। सचेत तब रह सकत हो जब आप मन कांग्रेस के इतिहास जानहु। यूपीए सरकार के उपलब्धि, वर्तमान छत्तीसगढ़ सरकार के उपलब्धि मन ल जानहु। अध्ययन होही तभे जवाब दे पाहु।
